បញ្ហាទាំងនេះនឹងកើតឡើង ប្រសិនបើអ្នកធ្វើលំហាត់ប្រាណ ដោយមិនទទួលទានទឹកឲ្យបានគ្រប់គ្រាន់

មនុស្សភាគច្រើនជឿថា ការទទួលទានទឹកនៅកំឡុងពេល និងក្រោយពេលធ្វើលំហាត់ប្រាណរួចភ្លាមជារឿងមិនល្អ។ ប៉ុន្តែអ្នកវិទ្យាសាស្ត្រជាច្រើន រួមទាំងអត្តពលិកអាជីពផងដែរនោះបែរជានិយាយថា អ្នកមិនគួរបង្អត់រាងកាយពីជាតិទឹក ឬសារធាតុរាវដែលចាំបាច់ឡើយ។ អ្នកគួរតែទទួលទានទឹកប្រមាណជាពី ១៥០ ទៅ ២៥០ មីលីលីត្រ នៅរយៈពេល ១៥ ទៅ ២០ នាទីម្ដង។ គ្រប់យ៉ាងអាស្រ័យទៅលើអាំងតង់ស៊ីតេនៃលំហាត់ប្រាណ។ ក្រុមអ្នកវិទ្យាសាស្ត្រជឿថា យើងគួរទទួលទានទឹកត្រជាក់ជំនួសទឹកក្ដៅឧណ្ហៗដើម្បីរក្សាសីតុណ្ហភាពធម្មតាក្នុងរាងកាយ។ ប្រសិនបើអ្នកធ្វើលំហាត់ប្រាណប្រភេទណាមួយដែលលើសពី ២ ម៉ោង ការជ្រើសរើសភេសជ្ជៈកីឡាដើម្បីទទួលទាន គឺប្រសើរជាងទឹកធម្មតា។ ប្រសិនបើអ្នកទទួលទានភេសជ្ជៈកីឡាខណៈពេលធ្វើលំហាត់ប្រាណ ចូរកុំភ្លេចទទួលទឹកធម្មតាភ្លាមតាមក្រោម។ អត្ថបទខាងក្រោមនឹងប​​​ង្ហាញឲ្យអ្នកបានដឹងពីបញ្ហាមួយចំនួនដែលកើតឡើង ប្រសិនបើអ្នកមិនព្រមទទួលទានទឹកពេលធ្វើលំហាត់ប្រាណ ៖

៩. ធ្វើឲ្យស្បែកឆាប់ចាស់ ៖ កីឡា ឬលំហាត់ប្រាណមានប្រសិទ្ធិភាពធ្វើឲ្យស្បែកប្រែជាក្មេងជាងវ័យ ដោយសារតែកោសិកាលំហូរឈាមរបស់ស្បែក គឺសំបូរទៅដោយអុកស៊ីហ៊្សែន ហើយខណៈនោះការផលិតស្រទាប់ collagen ក៏កើនឡើង ហើយស្នាមជ្រួញផ្សេងៗប្រែជាកាន់តែតូច។ ទោះជាយ៉ាងណាក៏ដោយ រាងកាយត្រូវការបរិមាណត្រឹមត្រូវ ឬគ្រប់គ្រាន់នៃសារធាតុរាវដើម្បីជួយសម្រួលដល់លំហូរឈាមរត់ឲ្យមានលក្ខណៈកាន់តែប្រសើរឡើង។

៨. អ្នកនឹងបាត់បង់ជាតិទឹក មិនមែនគីឡូនៃទម្ងន់ឡើយ ៖ មនុស្សមួយចំនួនគិតថា ប្រសិនបើពួកគេមិនទទួលទានទឹកនៅខណៈពេលធ្វើលំហាត់ប្រាណ ពួកគេនឹងស្រកទម្ងន់បានកាន់តែលឿន។ អ្នកអាចមើលឃើញលទ្ធផលភ្លាមៗលើជញ្ជីងបន្ទាប់ពីហាត់ប្រាណរួចប៉ុន្តែតាមពិតទៅ ជាតិខ្លាញ់ដែលលើស គឺមិនបានបាត់បង់នោះទេ អ្វីដែលអ្នកបាត់បង់ គឺជាតិទឹកក្នុងរាងកាយ ក៏ព្រោះនៅពេលដែលអ្នកចាប់ផ្ដើមទទួលទានទឹកលទ្ធផលនៅលើជញ្ជីងនឹងប្រែប្រួលខុសពីមុនភ្លាម។ កង្វះជាតិទឹកមិនអនុញ្ញាតឲ្យរាងកាយមានប្រសិទ្ធិភាពក្នុងការដុតបំផ្លាញកោសិកាជាតិខ្លាញ់ឡើយ។

៧. ជាតិពុលនៅតែស្ថិតពេញក្នុងរាងកាយ ៖ ខណៈពេលធ្វើលំហាត់ប្រាណ រាងកាយនឹងបញ្ចេញជាតិពុលតាមរយៈលំហូរឈាមនៃស្រទាប់ស្បែក និងញើស។ ប៉ុន្តែទោះជាយ៉ាងណាក៏ដោយ ប្រសិនបើរាងកាយ​​​មិនទទួលបាន ឬផ្ទុកជាតិទឹកគ្រប់គ្រាន់ទេនោះ ញើសនឹងមិនត្រូវបានបញ្ចេញមកក្រៅច្រើនដែរ ហើយជាតិពុលមួយចំនួនធំទៀតនឹងស្ថិតនៅក្នុងរាងកាយដដែល។

៦. ប្រសិទ្ធភាពនៃលំហាត់ប្រាណនឹងថយចុះ ៖ ក្រុមអ្នកវិទ្យាសាស្ត្រជឿថា កង្វះជាតិទឹកនឹងផ្ដល់ឥទ្ធិពលអវិជ្ជមានទៅលើប្រសិទ្ធភាពនៃការហាត់ប្រាណ។ ប្រសិនបើអ្នកបាត់បង់សារធាតុរាវ ឬជាតិទឹក ៥ ភាគរយ ប្រសិទ្ធិភាពនៃលំហាត់ប្រាណនឹងត្រូវថយចុះ ៣០ ភាគរយ។ ប្រសិនបើអ្នកបាត់បង់សារធាតុរាវ ឬជាតិទឹកក្នុងរាងកាយ ២ ភាគរយ វាមានន័យថាអ្នកមិនអនុញ្ញាតឲ្យរាងកាយធ្វើការដុតបំផ្លាញជាតិខ្លាញ់ ឬលូតលាស់សាច់ដុំឡើយ។

៥. សាច់ដុំរបស់អ្នកនឹងចាប់ផ្ដើមឈឺចាប់ ៖ អាការៈនៃការឈឺចាប់សាច់ដុំនឹងកើតឡើង បន្ទាប់ពីការធ្វើលំហាត់ប្រាណ។ ប៉ុន្តែប្រសិនបើអ្នកមិនទទួលទានទឹកឲ្យបានគ្រប់គ្រាន់ទេនោះ ការឈឺចាប់នឹងនៅតែបន្តឈឺរហូត ដោយមិនបាត់ទៅវិញត្រឹមរយៈពេល ២ ឬ ៣ ថ្ងៃឡើយ។ ការឈឺចាប់ Microtraumas (ឈឺចាប់ផ្នែកលើជង្គង់) ដែលកើតឡើងអំឡុងពេលធ្វើលំហាត់ប្រាណនឹងបាត់ទៅវិញដរាបណាសសៃសាច់ដុំទទួលបានសារជាតិប្រូតេអ៊ីន និងកាបូអ៊ីដ្រាត។ ហើយដំណើរការនេះអាចកើតឡើងទៅបាន លុះត្រាណាតែរាងកាយមានផ្ទុកជាតិទឹកគ្រប់គ្រាន់។

៤. ការកើនឡើងនូវហានិភ័យនៃជំងឺបេះដូង ៖ ប្រសិនបើអ្នកមិនទទួលទានទឹកបានគ្រប់គ្រាន់ទេនោះ ឈាមរបស់អ្នកនឹងប្រែជាខាប់ ហើយសសៃឈាមត្រូវរួមតូចរារាំងដល់បរិមាណនៃជាតិទឹក។ ជាលទ្ធផល បេះដូងត្រូវដំណើរការខ្លាំងជាងមុន ដោយសារតែបេះដូងព្យាយាមធ្វើឲ្យលំហូរឈាមដែលខាប់អាចឆ្លងកាត់សសៃឈាមតូចៗ។ ដំណើរការនេះអាចបណ្ដាលឲ្យបេះដូងលោតញាប់ជាងធម្មតា ដង្ហើមប្រែជាខ្លី ហើយសម្ពាធឈាមស្រាប់តែឡើងខ្ពស់។ ទោះបីជាអ្នកមានសុខភាពល្អ និងតែងធ្វើលំហាត់ប្រាណទៀងទាត់ក៏ដោយ ក៏បេះដូងនៅតែត្រូវទទួលផលប៉ះពាល់។

៣. ហើមក្រោមភ្នែក ៖ នៅពេលរាងកាយបាត់បង់ជាតិទឹក ឬទទួលបានជាតិទឹកមិនគ្រប់គ្រាន់ រាងកាយនឹងចាប់ផ្ដើមព្យាយាមរក្សាទុកជាតិទឹកដែលជាលទ្ធផល ការហើម និងឡើងខ្មៅក្រោមភ្នែកត្រូវលេចឡើង។

២. ពិបាកក្នុងការផ្ដោតអារម្មណ៍ ហើយហត់នឿយខ្លាំង ៖ បើទោះជាអ្នកបាត់បង់ជាតិទឹកត្រឹមតែ ១ ឬ ២ ភាគរយក៏ដោយ ក៏ការផ្ដោតអារម្មណ៍របស់អ្នកត្រូវថយចុះដែរ ហើយភាពតានតឹង និងអស់កម្លាំងវិញនឹងកើតឡើង។

១. ចាប់ផ្ដើមឃ្លានខ្លាំង ៖ មនុស្សភាគច្រើនយល់ច្រឡំការឃ្លានជាមួយនឹងការស្រេកទឹក។ ដូច្នេះប្រសិនបើអ្នកមិនទទួលទានទឹកនៅខណៈពេលធ្វើលំហាត់ប្រាណ ហើយស្រាប់តែមានអារម្មណ៍ថាឃ្លាន បន្ទាប់ពីហាត់រួច រាងកាយរបស់អ្នកប្រហែលជាគ្រាន់តែត្រូវការទឹកប៉ុណ្ណោះ មិនមែនអាហារឡើយ។ អ្នកគួរតែទទួលទឹក ១ កែវ ជាមុនសិន ហើយប្រសិនបើនៅតែមានអារម្មណ៍ឃ្លានដដែលនោះ សឹមទទួលទានអាហារផ្សេងៗ៕

អត្ថបទ ៖ Bee

ប្រភព ៖ Brightside