ថៃចាប់ផ្តើមតេស្ដវ៉ាក់សាំងកូវីដ១៩លើសត្វស្វា បន្ទាប់ពីជោគជ័យលើសត្វកណ្ដុរ
ក្រុមអ្នកស្រាវជ្រាវថៃកំពុងធ្វើតេស្ដវ៉ាក់សាំង COVID-19 ថ្មីទៅលើសត្វស្វាខណៈដែលប្រទេសនេះខិតខំផលិតវ៉ាក់សាំងមានតម្លៃសមរម្យ និងថាអាចប្រើប្រាស់បាននៅឆ្នាំ២០២១។ វេជ្ជបណ្ឌិត Suchinda Malaivitjitnond ប្រធានមជ្ឈមណ្ឌលស្រាវជ្រាវជាតិរបស់ថៃបានលើកឡើងថាវ៉ាក់សាំងថ្មីនេះបានចាក់ទៅលើសត្វស្វា ១៣ក្បាល ហើយសង្ឃឹមថាពេលជោគជ័យ វ៉ាក់សាំងដែលផលិតនៅប្រទេសថៃនឹងមានតម្លៃថោកជាងវ៉ាក់សាំងរបស់អឺរ៉ុប ឬសហរដ្ឋអាមេរិក។
ការតេស្ដលើសត្វស្វាធ្វើឡើងក្រោយពីទទួលបានជោគជ័យលើការតេស្ដលើសត្វកណ្ដុរ។ អ្នកវិទ្យាសាស្ត្រថៃបានសហការជាមួយនឹងអ្នកវិទ្យាសាស្ត្រនៅសាកលវិទ្យាល័យ Pennsyvania សហរដ្ឋអាមេរិកដោយប្រើប្រាស់បច្ចេកវិទ្យាថ្មីផ្អែកលើ mRNA ដែលជាប្រភេទមួយនៃហ្សែនមិនធ្លាប់ប្រើពីមុន ហើយត្រូវយកមកប្រើក្នុងការផលិតវ៉ាក់សាំងនេះ។ ដំណើរការវ៉ាក់សាំងនេះតម្រូវឲ្យចាក់បញ្ចូលលំដាប់ហ្សែនវីរុសដើម្បីភ្ញោចការឆ្លើយតបប្រព័ន្ធភាពស៊ាំឲ្យផលិតប្រូតេអ៊ីនប្រឆាំងនឹងវីរុស។ប្រសិនជាវ៉ាក់សាំងថ្មីរបស់ប្រទេសថៃទទួលបានជោគជ័យលើការតេស្ដលើសត្វស្វា ការតេស្ដលើមនុស្សនឹងចាប់ផ្ដើមនៅខែតុលា។
ក្រុមហ៊ុន២ផ្សេងទៀតដូចជាក្រុមហ៊ុនឱសថ Pfizer និង Moderna នៅសហរដ្ឋអាមេរិកកំពុងប្រើបច្ចេកវិទ្យាថ្មីផលិតវ៉ាក់សាំងនេះដែរ និងទទួលបានលទ្ធផលវិជ្ជមានក្នុងការធ្វើតេស្ដដំណាក់កាលដំបូងកាលពីសប្ដាហ៍មុន។
ក្រៅពីនេះ ក្រុមហ៊ុន Novavax នៅរដ្ឋ Maryland សហរដ្ឋអាមេរិកក៏បានចាប់ផ្ដើមតេស្ដដំណាក់កាលទី១លើវ៉ាក់សាំងថ្មីឈ្មោះថា NVX-CoV2373។ លទ្ធផលនៃការតេស្ដនេះនឹងចេញនៅខែកក្កដា។ វ៉ាក់សាំងនេះដែរគឺប្រើប្រាស់ Matrix-M adjuvant ដើម្បីបង្កើនការឆ្លើយតបនៃប្រព័ន្ធភាពស៊ាំ។ ប្រសិនជាដំណាក់កាលនេះទទួលបានជោគជ័យ ដំណាក់កាលទី២នឹងធ្វើឡើងនៅតាមប្រទេសជាច្រើនរួមទាំងសហរដ្ឋអាមេរិក ហើយដំណាក់កាលទី២នេះនឹងវាយតម្លៃទៅលើអង់ទីករ សុវត្ថិភាព និងការកាត់បន្ថយជំងឺ COVID-19 នៅលើក្រុមមនុស្សដែលមានវ័យផ្សេងៗគ្នា ឲ្យកាន់តែទូលាយជាងមុន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ