រាជធនីភ្នំពេញ៖ នៅថ្ងៃទី២៨ ខែមេសា ឆ្នាំ២០២៤ម្សិលមិញនេះ យោងតាមការបង្ហោះពីគណនីហ្វេសប៊ុកផេកផ្លូវការរបស់ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានសម្រេចដកថវិកាចំនួន ១លានដុល្លារ ដែលបានមកពីសប្បុរសជន ជួយឧបត្ថម្ភដល់ការប្រកួតកីឡាបាល់ទាត់សប្បុរសធម៌ យកទៅមន្ទីរពេទ្យកុមារអង្គរខេត្តសៀមរាប, មជ្ឈមណ្ឌលព្យាបាលកុមារបេះដូងជប៉ុន និងគ្រួសារយោធិនពលីក្នុងករណីផ្ទុះគ្រាប់។

តាមរយៈការបង្ហោះរបស់ សម្តេចតេជោ ហ៊ុន សែន មានខ្លឹមសារបញ្ជាក់យ៉ាងដូច្នេះថា៖ «ដំបូងខ្ញុំសូមអរគុណចំពោះសប្បុរសជនដែលបានចូលរួមជួយឧបត្ថម្ភដល់ការប្រកួតកីឡាបាល់ទាត់ដើម្បីសប្បុរសធម៌ ដែលមកដល់ពេលនេះបានចូលរួមតាមរយៈខ្ញុំមានជាង ៤,៨លានដុល្លារ (4,800,000$)។

ដើម្បីជួយដល់កន្លែងដែលជួបការលំបាកដែរនោះខ្ញុំសូមដកថវិកាចំនួន ១លានដុល្លារ(1,000,000$) ដើម្បីបែងចែកទៅ៖

១.មន្ទីរពេទ្យកុមារអង្គរខេត្តសៀមរាបចំនួន ៥០ម៉ឺនដុល្លារ (500,000$)។
២.មជ្ឈមណ្ឌលព្យាបាលកុមារបេះដូងជប៉ុនខេត្តកំពង់ស្ពឺ ៣០ម៉ឺនដុល្លារ(300,000$)។
៣.គ្រួសារយុទ្ធជនពលីករណីផ្ទុះគ្រាប់នៅយោធភូមិភាគ៣ចំនួន ២០គ្រួសារ ក្នុងមួយគ្រួសារ ១ម៉ឺនដុល្លារ(10,000$) សរុប២០ម៉ឺនដុល្លារ(200,000$)។ ឯថវិកាក្រៅពី១លានដុល្លារនេះនឹងប្រគល់ជូនមន្ទីរពេទ្យគន្ធបុប្ផាទាំងអស់៕»

ប្រភព៖ Samdech Hun Sen of Cambodia