ការ​រីក​ដុះ​ដាល​នៃ​ដុំ​សាច់​មហារីក​នៅ​ក្នុង​ក្រពះ ហៅ​ថា​ជំងឺ​មហារីក​ក្រពះ ហើយ​វា​កើត​ឡើង​នៅ​ពេល​ដែល​កោសិកា​ក្រពះ​កើន​ឡើង​ជា​ដុំ​សាច់។ ជំងឺ​សាហាវ​មួយ​នេះ អាច​រាល​ដាល​ទៅ​ផ្នែក​សរីរាង្គ​ដទៃ​ទៀត​បាន​ងាយ ហើយ​បើ​ព្យាបាល​មិន​ទាន់​ពេល​ទេ អាច​គំរាម​កំហែង​ដល់​ជីវិត​​អ្នក​ជំងឺ ដូច​នេះ​យើង​គ្រប់​គ្នា គួរ​ចាប់​អារម្មណ៍​រោគ​សញ្ញា​ក្នុង​ដំណាក់​កាល​ដំបូងៗ​របស់​វា។

ក្នុង​ដំណាក់​កាល​ដំបូង​ៗ មហារីក​ក្រពះ​ចេញ​សញ្ញា​បែប​ម៉េច?

វេជ្ជបណ្ឌិត ចាន់ រស្មី បាន​ឲ្យ​ដឹង​ថា នៅ​ពេល​ដែល​មហារីក​ក្រពះ​ចាប់​ផ្ដើម​កើត​នៅ​ក្នុង​ដំណាក់​កាល​ដំបូង​ៗ វា​មាន​ចេញ​រោគ​សញ្ញា​ស្រដៀង​គ្នា​ទៅ​នឹង​ជំងឺ​រលាក​ក្រពះ​ដែរ​ដូច​ជា៖

– ពិបាក​រំលាយ​អាហារ និង​មិន​ស្រួល​ក្រពះ
– មាន​អារម្មណ៍​ថា ហើម​ពោះ បន្ទាប់​ពី​បរិភោគ​រួច
– ចង្អោរ​តិចតួច
– មិន​សូវ​ឃ្លាន​អាហារ
– ចុក​ចុង​ដង្ហើម។

ផ្ទុយ​ទៅ​វិញ បើ​ជំងឺ​មហារីក​ក្រពះ​កាន់​តែ​ធ្ងន់ធ្ងរ វា​អាច​បណ្ដាល​អោយ​មាន​រោគ​សញ្ញា​ផ្សេង​ទៀត ដូច​ជា៖

– មាន​អាការៈ​មិន​ស្រួល​ផ្នែក​ខាង​លើ ឬ​ពាក់​កណ្ដាល​នៃ​ពោះ
-​ មាន​ឈាម​ក្នុង​លាមក
– ក្អួត ឬ​ក្អួត​ឈាម
– ស្រក​ទម្ងន់​
– ឈឺ ឬ​ហើម​ពោះ បន្ទាប់​ពី​បរិភោគ​រួច
– ខ្សោយ​អស់​កម្លាំង និង​ស្លេក​ស្លាំង ដោយ​សារ​ខ្វះ​កោសិកា​គ្រាប់​ឈាម​ក្រហម។

លោក​វេជ្ជបណ្ឌិតបន្ថែម​ទៀត​ថា សម្រាប់​ជំងឺ​មហារីក​ក្រពះ​នៅ​ក្នុង​ដំណាក់​កាល​ដំបូងៗ​អាច​ព្យាបាល​ឲ្យ​ជា​សះ​ស្បើយ និង​អត្រា​សង្ឃឹម​រស់​បាន​ខ្ពស់ ប៉ុន្តែ​ជំងឺ​មហារីក​ក្រពះ​នេះ កម្រ​នឹង​ចេញ​រោគ​សញ្ញា​ឲ្យ​ដឹង​នៅ​ដំណាក់​កាល​ដំបូង​ណាស់។ កាលណា​បើ​វា​រាល​ដាល​ដល់​ដំណាក់​កាល​ចុង​ក្រោយ​ហើយ វា​ពិបាក​នឹង​អាច​ព្យាបាល​ឲ្យ​ជា​សះ​ស្បើយ​ណាស់ និង​បណ្ដាល​ឲ្យ​អ្នក​ជំងឺ​សង្ឃឹម​រស់​ទាប។ ដូច​នេះ មធ្យោបាយ​ល្អ​តែ​មួយ​ដែល​អាច​ឲ្យ​យើង​ដឹង​ពី​ការ​លូត​លាស់​របស់​កោសិកា​មហារីក គឺ​ការ​ពិនិត្យ​សុខភាព​ជា​ប្រចាំ​។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ផ្តល់សិទ្ធិដោយ៖ Helloគ្រូពេទ្យ