គ្រូពេទ្យព្រមានថា អង្គុយលេងទូរស័ព្ទយូរៗពេលចូលបង្គន់អាចធ្វើឲ្យមានជំងឺឫសដូងបាត
- July 11, 2020
មនុស្សជាច្រើនបានចោទសំណួរឡើងថាតើការលេងទូរស័ព្ទពេលចូលបង្គន់អាចបង្កឲ្យមានជំងឺឫសដូងបាតពិតដែរឬទេ? ចម្លើយគឺអាច ហើយគ្រូពេទ្យបានព្រមានដែរថាការអង្គុយលើបង្គន់យូរអាចបង្កជំងឺឫសដូងបាត ព្រោះការអង្គុយបែបនេះអាចបន្ថែមសម្ពាធទៅលើសរសៃវ៉ែននៅរន្ធគូទ និងការប្រឹងបញ្ចេញលាមកក៏ជាមូលហេតុបង្កដែរ។
ពេលចូលបន្ទប់ទឹក មិនថាយើងអានសៀវភៅ ឬលេងទូរស័ព្ទទេ ហានិភ័យនៃការវិវត្តជំងឺឫសដូងបាតកាន់តែខ្ពស់នៅពេលយើងអង្គុយលើចានបង្គន់កាន់តែយូរ។ ការលេងទូរស័ព្ទនេះគឺមិនប៉ះពាល់ដោយផ្ទាល់ទៅនឹងការកើតជំងឺឫសដូងបាតទេ តែការលេងទូរស័ព្ទពេលចូលបន្ទប់ទឹកនឹងធ្វើឲ្យយើងចំណាយពេលយូរអង្គុយលើចានបង្គន់ ដែលជាហេតុនាំឲ្យមានហានិភ័យកើតជំងឺឫសដូងបាត។
រឿងដែលថាទូរស័ព្ទក្លាយជាមូលហេតុនៃជំងឺនេះគឺដោយសារទូរស័ព្ទមានភាពងាយស្រួលក្នុងយកតាមខ្លួនគ្រប់ទីកន្លែង ហើយបញ្ហាចម្បងគឺថាយើងនឹងអង្គុយលើបង្គន់យូរព្រោះរវល់នឹងទូរស័ព្ទ ទោះបីជាយើងបានបន្ទោរបង់រួចហើយក៏ដោយ។ ជំងឺឫសដូងបាតជាទូទៅបង្កដោយការប្រឹងបញ្ចេញលាមកដែលយូរៗទៅអាចធ្វើឲ្យជាលិកាទ្រទ្រង់រន្ធគូទមានការដាច់រលាត់។
ជំងឺឫសដូងបាតគឺមាន២ប្រភេទ។ ប្រភេទទី ១ គឺឫសដូងបាតនៅខាងក្នុង និងប្រភេទមួយទៀតគឺឫសដូងបាតខាងក្រៅ។ រោគសញ្ញារបស់ជំងឺរួមមានការហូរឈាមក្រោយពេលបន្ទោរបង់ និងមានអារម្មណ៍ថាចង់បន្ទោរបង់ទៀតក្រោយពីបន្ទោរបង់ហើយ។
វេជ្ជបណ្ឌិត Meheshinder Singh អ្នកពិគ្រោះជំងឺទូទៅ និងអ្នកជំនាញវះកាត់ពោះវៀនធំនៅមន្ទីរពេទ្យ Pantai ប្រទេសម៉ាឡេស៊ីបានណែនាំមិនឲ្យលេងពពួកគ្រឿងអេឡិតត្រូនិច ជាពិសេសទូរស័ព្ទដៃពេលចូលបង្គន់ឡើយ។ ប៉ុន្តែនេះអាចនឹងមានលំបាកសម្រាប់ក្មេងៗជំនាន់នេះ។
ចំណែកវេជ្ជបណ្ឌិត Sarah Jarvis ឯកទេសជំងឺទូទៅ និងជាប្រធានគេហទំព័រ Patient.info ក៏បានលើកឡើងដែរថាដើម្បីចៀសវាងជំងឺឫសដូងបាតគួរញ៉ាំអាហារជាតិសរសៃឲ្យបានច្រើន ហាត់ប្រាណឲ្យបានទៀងទាត់ និងចៀសវាងការលេងទូរស័ព្ទពេលចូលបង្គន់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: