រាជធានីភ្នំពេញ ៖ រថយន្ត Land Cruiser បើកបរដោយប្ដីប្រពន្ធ២នាក់ ក្នុងល្បឿនលឿន បំពានភ្លើងស្តុប ទៅបុកជាមួយរថយន្តស៊េរីទំនើប LEXUS RX200t កណ្ដាលស្តុបផ្សារទួលទំពូង បណ្ដាលឲ្យខូចខាតយ៉ាងដំណំ បង្កការភ្ញាក់ផ្អើលដល់សមត្ថកិច្ចមូលដ្ឋានចុះទៅពិនិត្យមើលភ្លាមៗផងដែរ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីនាម៉ោង១១យប់ ថ្ងៃទី១៩ ខែតុលា ឆ្នាំ២០២០នេះ ស្ថិតនៅចំណុចស្តុបផ្សារទួលទំពូង ផ្លូវបែកជាបួន លើផ្លូវ១៦៣ កែងផ្លូវ៤៣២ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ។

សាក្សីដែលឃើញហេតុការណ៍ផ្ទាល់បានរៀបរាប់ប្រាប់ថា នៅមុនពេលកើតហេតុ គេឃើញរថយន្តមួយគ្រឿង ម៉ាក LEXUS RX200t ពណ៌ទឹកប្រាក់ ពាក់ស្លាកលេខភ្នំពេញ 2BN-6696 បើកបរដោយបុរសម្នាក់ និងស្ត្រីម្នាក់ទៀតជាប្រពន្ធរួមដំណើរជាមួយ បានធ្វើដំណើរតាមបណ្តោយផ្លូវលេខ១៦៣ ទិសដៅពីត្បូងមកជើង ក្នុងល្បឿនធម្មតា លុះមកដល់ចំណុចកើតហេតុ ភ្លើងស្តុបពណ៌បៃតង ក៏បន្តដំណើរឆ្លងកាត់ផ្លូវបំបែកជាបួននោះធម្មតា ស្រាប់តែមានបុរសស្ត្រី២នាក់ បើករថយន្តមួយគ្រឿង ម៉ាក LAND Cruiser ពាក់ស្លាកលេខភ្នំពេញ 2I-8647 ពណ៌ខ្មៅ ធ្វើដំណើរតាមផ្លូវលេខ៤៣២ ទិសដៅពីកើតមកលិចវិញ ក្នុងល្បឿនយ៉ាងលឿន ហើយរថយន្តមិនបើកភ្លើងបំភ្លឺខាងមុខទេ បានមកបុកចំចំហៀងខាងស្ដាំរថយន្ត RX200t បណ្ដាលឲ្យខូចខាតមួយចំហៀងខាងស្ដាំពីមុខដល់ក្រោយ ចំណែកឯរថយន្ត Land Cruiser វិញខូចខាតមួយកំណាត់មុខ និងផ្ទុះពោងសុវត្ថិភាពក្នុងរថយន្តថែមទៀតផង តែសំណាងល្អមិនបណ្តាលឲ្យនរណាម្នាក់រងរបួសនោះទេ បង្កការភ្ញាក់ផ្អើលដល់កម្លាំងនគរបាលប៉ុស្តិ៍ទួលទំពូងទី១ និងទួលទំពូងទី២ ចុះមកពិនិត្យមើលផងដែរ។

ភ្លាមៗនោះ ភាគីខាងរថយន្ត Land Cruiser ទាំងប្រុសទាំងស្រីបានមកនិយាយជាមួយភាគីខាងរថយន្ត RX200t ទាំងស្ថានភាពឈរទប់ខ្លួនមិននឹងឡើយ ហើយខាងស្រីវិញ ទប់ខ្លួនមិនបានក៏ដើរទៅដេកផ្អែកខ្លួននឹងជញ្ជាំងមុខផ្ទះលក់ទូរស័ព្ទជាប់កន្លែងកើតហេតុតែម្ដង ។

ទោះបីជាយ៉ាងណាក៏ដោយ ក្រោយពេលកើតហេតុសមត្ថកិច្ចមូលដ្ឋានសហការជាមួយផ្នែកវាស់វែងចរាចរណ៍នៃអធិការដ្ឋាននគរបាលខណ្ឌចំការមន បានចុះទៅពិនិត្យមើល និងរាយការណ៍ប្រាប់សមត្ថកិច្ចជំនាញ ចុះមកវាស់វែងយករថយន្តទាំងពីរគ្រឿង ទៅរក្សាទុកបណ្ដោះអាសន្ន នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់៕

ដោយ៖ បងម៉េង ខ្មែរណូត