បុរសម្នាក់បើករថយន្ត Prius ឆ្លងផ្លូវបំបែកជាបួន ត្រូវក្រុមចិនបើករថយន្ត KIA លឿនស្លេវបុកមួយទំហឹងខ្ទេចមួយកំណាត់មុខ សង២ពាន់ដុល្លារបញ្ចប់រឿង
រាជធានីភ្នំពេញ ៖ រថយន្ត PRUIS មួយគ្រឿង ជាសមាជិកក្រុម (Prius Meeting Group PMG) បើកបរដោយបុរសម្នាក់ ឆ្លងកាត់ផ្លូវបំបែកជាបួន ត្រូវជនជាតិចិនប្រុសស្រីមួយក្រុម បើករថយន្ត KIA CARNIVAL លឿនស្លេវ ឆ្លងកាត់ពីមុខក៏បុកអូសកាងមុខរថយន្ត PRIUS ខ្ទេចមួយកំណាត់មុខ ចំណែកឯរថយន្ត KIA ខូចខាតចំហៀងខាងស្ដាំ និងផ្ទះបែកកង់មុខខាងឆ្វេង ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅផ្លូវបំបែកជាបួន លើផ្លូវលេខ២១៤ កែងផ្លូវបាស្ទ័រ(៥១) ស្ថិតក្នុងសង្កាត់បឹងរាំង ខណ្ឌដូនពេញ កាលពីវេលាម៉ោង០៣:៤០នាទីទាបភ្លឺ ឈានចូលថ្ងៃទី០១ ខែវិច្ឆិកា ឆ្នាំ២០២០នេះ ។
បើតាមសម្ដីបុរសម្នាក់ដែលជាអ្នកបើករថយន្ត PRIUS ពណ៌ខ្មៅ ពាក់ស្លាកលេខភ្នំពេញ 2AU-9705 ដែលមានបិតស្ទីគ័រសម្គាល់របស់ក្រុម (Prius Meeting Group PMG) បានរៀបរាប់ប្រាប់អ្នកយកព័ត៌មានខ្មែរណូតយើងថា នៅមុនកើតហេតុ គាត់បានបើករថយន្តខាងលើ ធ្វើដំណើរតាមផ្លូវលេខ២១៤ ទិសដៅពីលិចមកកើត ក្នុងល្បឿនលឿនល្មម លុះមកដល់ចំណុចើតហេតុ កែងផ្លូវបាស្ទ័រ ស្រាប់តែមានរថយន្តមួយគ្រឿង ម៉ាក KIA CARNIVAL ពណ៌ឈាមជ្រូក ពាក់ស្លាកលេខភ្នំពេញ 2AQ-2558 បើកបរដោយបុរសជនជាតិចិនម្នាក់ និងជនជាតិចិនប្រុសស្រី២នាក់ទៀត ជាអ្នករួមដំណើរ បានធ្វេីដំណើរតាមផ្លូវបាស្ទ័រ ទិសដៅពីជើងមកត្បូង ឆ្លងកាត់ពីមុខរថយន្ត PRIUS របស់គាត់ ទើបបណ្តាលឲ្យបុកអូសកាងមុខរថយន្ត PRIUS ខ្ទេចមួយកំណាត់មុខ និងធ្លាក់កាងមុខបែកបាក់យ៉ាងដំណំ ដោយមិនមានភាគីខាងណារងរបួសនោះទេ ចំណែកឯរថយន្ត KIA ខូចខាតចំហៀងខាងស្ដាំ និងផ្ទុះពោងសុវត្ថិភាពក្នុងរថយន្តថែមទៀតផង រួមទាំងផ្ទះបែកកង់មុខខាងឆ្វេង បើកទៅមុខលែងរួច ភ្លាមៗនោះជនជាតិចិនដែលជាអ្នកបើកបរបម្រុងរត់គេចខ្លួន តែត្រូវភាគីខាងរថយន្ត PRIUS ឃាត់បាន រួចនាំមកចរចារគ្នាផងដែរ ។
ក្រោយពេលចរចារគ្នារួចមក ភាគីខាងជនជាតិចិន បានសងសំណងជាទឹកប្រាក់ចំនួន ២ពាន់ដុល្លារ ប្រគល់អោយភាគីខាងរថយន្ត PRIUS ដើម្បីបញ្ចប់រឿងនៅកន្លែងកើតហេតុតែម្ដង ៕
ដោយ៖ បងម៉េង ខ្មែរណូត