រថយន្ត RANGE ROVER បោះពួយបុករបាំងថ្មទ្រូងផ្លូវ ខ្ទេចមួយកំណាត់មុខ និងផ្ទុះពោងសុវត្ថិភាព ទេីបតៃកុងមិនរបួសសូម្បីបន្តិច ហេីយគេចខ្លួនបាត់
រាជធានីភ្នំពេញ ៖ គ្រោះថ្នាក់ចរាចរណ៍មួយបង្កឡេីងដោយរថយន្តស៊េរីទំនេីប Range Rover បេីកបោះពួយក្នុងល្បឿនលឿន បានជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរបាំងថ្មបាក់បែកដួលរលំអស់២ផ្ទាំង និងរថយន្តខ្ទេចអស់មួយកំណាត់មុខយ៉ាងដំណ និងផ្ទុះពោងសុវត្ថិភាពក្នុងរថយន្ត ទេីបមិនបណ្ដាលឲ្យអ្នកបេីកបររងរបួសនោះទេ ។
ហេតុការណ៍គ្រោះថ្នាក់ចរាចរណ៍ខាងលេីនេះបានកើតមានឡើងនៅវេលាម៉ោង០១:១០នាទីយប់រំលងអាធ្រាត្រ ឈានចូលថ្ងៃទី០៨ ខែវិច្ឆិកា ឆ្នាំ២០២០នេះ នៅត្រង់ចំណុចស្កុបប្រាសាទពេជ្រ លេីផ្លូវព្រះមុនីវង្ស កែងផ្លូវ១៨២ ស្ថិតក្នុងភូមិ៨ សង្កាត់បឹងរាំង ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យក្រុមការងារខ្មែរណូតដឹងថា នៅមុនពេលកើតហេតុ គេបានឃើញរថយន្តស៊េរីទំនេីបមួយគ្រឿង ម៉ាក RANGE ROVER ពណ៍ខ្មៅ ពាក់ស្លាកលេខភ្នំពេញ 2S-5549 បេីកបរដោយមនុស្សមិនស្គាល់អត្តសញ្ញាណម្នាក់ បានធ្វើដំណើរតាមបណ្ដោយផ្លូវព្រះមុនីវង្ស ទិសដៅពីត្បូងមកជេីង ក្នុងល្បឿនលឿន លុះមកដល់ចំណុចកើតហេតុ បានរេចង្កូតទៅបុកជាមួយរបាំងថ្មក្បាលព្រួញពុះចែកទ្រូងផ្លូវពេញទំហឹង លាន់លឺដូចរន្ទះ បណ្ដាលឱ្យរបាំងថ្មខ្ទាតដួលរលំខូចខាតអស់ពីរផ្ទាំង ហើយរថយន្តបង្ករងការខូចខាតខ្ទេចអស់មួយកំណាត់មុខយ៉ាងដំណ និងផ្ទុះពោងសុវត្ថិភាពក្នុងរថយន្ត ទេីបមិនបណ្ដាលឲ្យអ្នកបេីកបររងរបួសនោះទេ តែក្រោយមកអ្នកបេីករថយន្តបង្ក បានចុះពីលើរថយន្តហើយគេចខ្លួនបាត់ មុនសមត្ថកិច្ចចុះមកដល់។ ក្រោយមកទើបបងប្អូនប្រជាពលរដ្ឋដែលធ្វេីដំណេីរឆ្លងកាត់ចំណុចកេីតហេតុបានឃេីញ ក៏រាយការណ៍ផ្ដល់ដំណឹងប្រាប់ទៅសមត្ថកិច្ចមូលដ្ឋានចុះមកពិនិត្យមើលតែម្ដង។
បច្ចុប្បន្នក្រោយពេលកេីតហេតុ សមត្ថកិច្ចមូលដ្ឋាន បានចុះមកដល់ រួចទាក់ទងសហការជាមួយសមត្ថកិច្ចជំនាញ ចុះមកវាស់វែង និងស្ទូចយករថយន្តបង្ក យកទៅរក្សាទុកបណ្ដោះអាសន្ន នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការស្រាវជ្រាវរកម្ចាស់រថយន្តអោយចូលខ្លួនដោះស្រាយលេីការខូចខាតទ្រព្យសម្បត្តិរដ្ឋតាមផ្លូវច្បាប់ផងដែរ៕
ដោយ៖ បងម៉េង ខ្មែរណូត