រដ្ឋបាលខណ្ឌកំបូល បញ្ជាក់ថា កម្មកររោងចក្រ អេ អុឹម ធូ ចំនួន ៤៥៧នាក់ នឹងត្រូវដឹកជញ្ជូនមកស្នាក់នៅ និងធ្វេីចត្តាឡីស័ក ១៤ ថ្ងៃ នៅក្នុងបរិវេណសាលាបឋមសិក្សាទ្រនំជ្រឹងវិញ
យោងតាមការបញ្ជាក់ពី រដ្ឋបាលខណ្ឌកំបូល មុននេះបន្តិចបានឲ្យដឹងថា អនុវត្តន៍តាមបទបញ្ជាយ៉ាងម៉ឺងម៉ាត់ ប្រកបដោយការទទួលខុសត្រូវខ្ពស់របស់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ នៅល្ងាចថ្ងៃសៅរិ៍ ទី១០ ខែមេសា ឆ្នាំ២០២១នេះ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល និងជាប្រធានគណៈបញ្ជាឯកភាពរដ្ឋបាលខណ្ឌកំបូល បានដឹកនាំកំលាំងសរុបរបស់រដ្ឋបាលខណ្ឌកំបូល រួមមានមន្ត្រីសាលាខណ្ឌ មន្ត្រីអធិការដ្ឋាននគរបាលខណ្ឌ សន្តិសុខសាលាខណ្ឌ និងមន្ត្រីសង្កាត់ ប្រជាការពារសង្កាត់បឹងធំ
ចុះរៀបចំទីតាំងធ្វេីចត្តាឡីស័ករបស់បងប្អូនកម្មករ កម្មការនី រោងចក្រ អេ អុឹម ធូ (AM2) ចំនួន ៤៥៧ នាក់ ដែលនៅវេលាម៉ោង២១.០០ នាទីយប់នេះ នឹងត្រូវដឹកជញ្ជូនមកស្នាក់នៅ និងធ្វេីចត្តាឡីស័ករយៈពេល ១៤ ថ្ងៃ នៅក្នុងបរិវេណសាលាបឋមសិក្សាទ្រនំជ្រឹង ស្ថិតតាមបណ្តោយផ្លូវលេខ ៤២ ភូមិខ្ចៅ សង្កាត់បឹងធំ ខណ្ឌកំបូល រាជធានីភ្នំពេញ ដោយក្នុងនោះការចំណាយក្នុងការធ្វេីចត្តាឡីស័កនេះ គឺជាបន្ទុករបស់រដ្ឋបាលរាជធានីភ្នំពេញ៕
