ក្រុមហ៊ុន Apple បានតម្លើងតម្លៃផលិតផល iPhone របស់ជាបន្តបន្ទាប់ ដែលធ្វើឲ្យអតិថិជនរបស់ Apple នាំគ្នាបើកភ្នែកធំៗជាមួយតម្លៃ ដែលឡើងថ្លៃនេះ។ ក្រុមហ៊ុន Apple បានចាប់ផ្ដើមតម្លើងតម្លៃ iPhone ម្ដងបន្តិចៗចាប់តាំងពីឆ្នា 2007 មកម៉្លេះ តែ Apple បានហក់ខ្លាំងគឺនៅពេល iPhone X បានបង្ហាញខ្លួន កាលពីឆ្នាំទៅដែលមានតម្លៃរហូតដល់ទៅ $999 ដែលនេះគឺជាតម្លៃហក់ខ្លាំងបំផុតក្នុងចំណោម iPhone ទាំងអស់។ កាលពីថ្ងៃពុធកន្លងទៅនេះ ក្រុមហ៊ុនយក្សមួយនេះបានប្រកាសចេញនូវស្មាតហ្វូន៣ម៉ូឌែលរបស់ខ្លួនផងដែរ ហើយវាក៏ជាស្មាតហ្វូន ដែលមានតម្លៃថ្លៃពុំធ្លាប់មានពីមុនផងដែរសម្រាប់ក្រុមហ៊ុននេះ ដែល iPhone Xs Max មានតម្លៃដល់ទៅ $1099 ហើយអតិថិជននឹងត្រូវចំណាយដល់ទៅ $1499 សម្រាប់ម៉ូឌែល ដែលមានអង្គចងចាំ 512GB។

ក្រុមហ៊ុន Apple ត្រូវប្រាកដថា អតិថិជនរបស់ខ្លួនហ៊ានចំណាយសម្រាប់តម្លៃថ្មីនេះឬទេ? ការធ្វើតេស្តកាលពីឆ្នាំទៅជាមួយ iPhone X ដែលមានតម្លៃថ្លៃ តែក្រុមហ៊ុនក៏បានរក្សានៅ iPhone 8 ដែលមានតម្លៃធម្មតា ហើយក្រុមហ៊ុនក៏បានទម្លាក់តម្លៃម៉ូឌែលចាស់របស់ខ្លួនដែរ។ ក្រុមហ៊ុន Apple មានចេតនាធ្វើតេស្តសម្រាប់ការឡើងថ្លៃផលិតផលរបស់ខ្លួន ហើយអ្វីដែលគេទទួលបានគឺ អតិថិជនរបស់ក្រុមហ៊ុនមួយនេះ ចូលចិត្តចំណាយទៅលើម៉ូឌែលស្មាតហ្វូន ដែលមានតម្លៃថ្លៃ នេះបើយោងតាមការវិភាគរបស់លោក Wayne Lam អ្នកវិភាគប្រចាំក្រុមហ៊ុន IHS Markit ។

iPhone Xs អាចជាអ្នកជំនួសកន្លែង iPhone X ព្រោះដោយសារតម្លៃរបស់វាប្រហាក់ប្រហែលគ្នា ពេលចេញលក់លើកដំបូងក្នុងតម្លៃ $999 ។ ហើយ iPhone Xr គឺសម្រាប់អ្នកដែលមានថវិការទាប វាជាចំណុចមួយល្អដែរ ដែលក្រុមហ៊ុនApple នៅគិតដល់ចំនុចនេះ។ ក្រុមហ៊ុនក៏បានបញ្ចុះតម្លៃ iPhone 7 មកនៅត្រឹម $449 ហើយ iPhone 8 មកនៅត្រឹម $559 ផងដែរ។ ចុងក្រោយជម្រើសដ៏ល្អមួយទៀត ដែលអតិថិជនអាចបង់រំលស់បានដូចជាក្នុងមួយខែ ត្រឹម $30 ជាមួយប្រព័ន្ធទូរស័ព្ទក្រុមហ៊ុន T.Mobile តែអតិថិជនក៏ត្រូវបង់ប្រាក់ដំបូង $279.99 សិនដែរ៕

អត្ថបទ៖ ឧស្សាហ៍
ប្រភព៖ CNN