បង្កើតគណនីហ្វេសប៊ុកក្លែងក្លាយជាច្រើន ថាខ្លួនជាប្រុសស្អាត និងមានចិត្ដស្មោះ ដើម្បីបោកប្រាស់នារីៗមួយចំនួនដែលនិយមស្នេហាតាម online ត្រូវបានសមត្ថកិច្ចស្រាវជ្រាវនិងបង្រ្កាបបាន
កំពង់ស្ពឺ៖ ជនសង្ស័យម្នាក់មានឈ្មោះពិត មាស ចាន់ប៊ុណ្ណា ភេទប្រុស អាយុ៣៩ឆ្នាំ រស់នៅភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ខេត្ដបន្ទាយមានជ័យ មានជំនាញបង្កើតគណនីហ្វេសប៊ុកក្លែងក្លាយ account fake ជាច្រើន ដេីម្បីធ្វើសកម្មភាពបោកប្រាស់នារីៗ និងស្រ្ដីមួយចំនួនឱ្យលង់ជឿជាក់ ព្រមធ្វេីតាមលក្ខខណ្ឌមួយចំនួន(👳) ចុងក្រោយក្លាយជាចំណាប់ខ្មាំងរបស់ជនសង្ស័យនេះ។
ករណីនេះដោយបានកិច្ចសហការពីជនរងគ្រោះជាច្រើន និងបានការដឹកនាំចង្អុលការណ៍ណែនាំដ៏ខ្ពង់ខ្ពាស់ពី លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ និងបានការសម្របសម្រួលនីតិវិធីពី អយ្យការ អមសាលាដំបូងខេត្ដកំពង់ស្ពឺ សមត្ថកិច្ចផែនការងារសន្តិសុខ ខេត្តកំពង់ស្ពឺ បានបន្ដស្រាវជ្រាវនិងសហការជាមួយនគរបាលខេត្ដបន្ទាយមានជ័យ ធ្វើការឃាត់ខ្លួនមុខសញ្ញាសង្ស័យបាននៅគោលដៅ សង្កាត់ប៉ោយប៉ែត ក្រុងប៉ោយប៉ែត ខេត្ដបន្ទាយមានជ័យ រួចបញ្ជូនមកស្នងការដ្ឋាននគរបាលខេត្តកំពង់ស្ពឺ ចំណាត់ការតាមនីតិវិធី។
នៅចំពោះមុខ ជនសង្ស័យបានឆ្លើយទទួលស្គាលថា សកម្មភាពបោកប្រាស់នារី និងស្រ្ដីមួយចំនួនតាមរយៈប្រព័ន្ធបណ្ដាញទំនាក់ទំនងសង្គម facebook account fake គឺពិតជាបានធ្វេីសកម្មភាពដោយផ្ទាល់និងចេះជំនាញយ៉ាងពិតប្រាកដ បច្ចុប្បន្នខ្លួនបានបង្កេីត account facebook ចំនួន ១៥ ដេីម្បីធ្វើសកម្មភាពបោកប្រាស់នារី និងស្រ្ដីមួយចំនួន អោយលង់ជឿជាក់ថាខ្លួនជាប្រុសស្អាត និងជាអ្នកមានចិត្ដស្មោះ។
បច្ចុប្បន្នជនសង្ស័យត្រូវបានចៅក្រមសម្រេចចេញដីកាបង្គាប់ឱ្យឃុំខ្លួនបណ្ដោះអាសន្ន នៅពន្ធនាគារខេត្តកំពង់ស្ពឺ រង់ចាំការជំនុំជំម្រះទោសនៅពេលបន្ទាប់។
សំណូមពរ ៖ ស្នេីសុំបងប្អូនពលរដ្ឋខ្មែរ ពិសេសនារីក្មេងៗ និងស្រ្ដីមួយចំនួន គួរតែពិចារណាឱ្យបានច្បាស់នៅពេលដែលខ្លួនបានបង្កេីតទំនាក់ទំនង ជា friends ជាមួយនរណាម្នាក់តាម បណ្ដាញទំនាក់ទំនងសង្គម ហ្វេសប៊ុក ណាមួយ ? ពិសេសកុំចាញ់បោកលេី profile រូប ប្រុសស្អាត- ស្រី ស្អាត
ប្រភព៖ អគ្គស្នងការដ្ឋាននគរបាលជាតិ