មន្ត្រីជំនាញ រកឃើញសិប្បកម្មផលិតពពុះសណ្ដែកចំនួន ២ទីតាំងមានផ្ទុកសារធាតុហាមឃាត់ និងផ្អាកចរាចរអំបិលចំនួន ១២តោន ក្នុងភូមិសាស្ត្ររាជធានីភ្នំពេញ

យោងតាមការចុះផ្សាយរបស់ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឲ្យដឹងថា នៅថ្ងៃទី០១ ខែធ្នូ ឆ្នាំ២០២១ មន្រ្តីស៊ើបអង្កេតសាខា ក.ប.ប. ប្រចាំរាជធានីភ្នំពេញ និងខេត្តកណ្ដាល បានចេញប្រតិបត្តិការត្រួតពិនិត្យសិប្បកម្មផលិតពពុះសណ្ដែក ផលិតទឹកត្រី ទឹកស៊ីអ៊ីវ ទឹកខ្មេះ និងសិប្បកម្មកែច្នៃអំបិល ដែលមានទីតាំងស្ថិតក្នុងភូមិសាស្ត្ររាជធានីភ្នំពេញ និងខេត្តកណ្តាល។

គោលបំណងនៃការចុះត្រួតពិនិត្យដើម្បីរកវត្តមានសារធាតុគីមីហាមឃាត់ និងភាពអនុលោមទៅនឹងលក្ខខណ្ឌបច្ចេកទេស ធានាការពារសុខភាពជូនប្រជាពលរដ្ឋ។ យោងតាមលទ្ធផលត្រួតពិនិត្យក្នុងខេត្តកណ្ដាលបានរកឃើញសិប្បកម្មចំនួន ០២ ទីតាំងក្នុងចំណោម ០៣ ទីតាំងមិនមានភាពអនុលោមដោយបានធ្វើការដកហូតពពុះសណ្ដែកមួយចំនួន និងពិន័យអន្តរការណ៍តាមនីតិវីធី។

ចំណែកក្នុងរាជធានីភ្នំពេញបានដកហូតនូវទឹកត្រីចំនួន ១៨០ ដប ដែលស្មើនឹង ២៧ គីឡូក្រាមមករក្សាទុកដើម្បីធ្វើការកម្ទេចចោលនាពេលក្រោយ និងផ្អាកចរាចរអំបិលចំនួន ១២ តោន និង ៤០០គីឡូក្រាម និងតម្រូវឱ្យម្ចាស់សិប្បកម្មចូលខ្លួនមកបំភ្លឺនៅសាខារាជធានីផងដែរ ៕

ប្រភព៖ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF