ខេត្តកណ្ដាល៖ យោងតាមការចុះផ្សាយរបស់ មន្ទីរសាធារណការ និងដឹកជញ្ជូនខេត្តកណ្ដាល នៅថ្ងៃទី២៣ ខែធ្នូ ឆ្នាំ២០២១ បានចេញសេចក្ដីជូនដំណឹងស្តីពីការបិទចរាចររថយន្តធុនធ្ងន់ លើកំណាត់ផ្លូវជាតិលេខ២១បេ (១១៥) ចាប់ពីម៉ោង៦៖០០ល្ងាច ដល់ម៉ោង៣៖០០ទាបភ្លឺ ចាប់ពីថ្ងៃទី២២ ដល់ថ្ងៃទី៣១ ខែធ្នូ ឆ្នាំ ២០២១។

មន្ទីរសាធារណការ និងដឹកជញ្ជូន ខេត្តកណ្ដាល មានកិត្តិយសសូមជម្រាបជូនដំណឹងដល់ម្ចាស់រថយន្តដឹកទំនិញធុនធ្ងន់ទាំងអស់មេត្តាជ្រាបថា៖ មន្ទីសាធារណការ បានបើកការដ្ឋានសាងសង់លូកាត់ទទឹងផ្លូវប្រវែង ២០ម៉ែត្រ ត្រង់ស្ថានីយបូមទឹកដើមអំពិលចាស់ ផ្លូវជាតិលេខ២១បេ(១១៥) សម្រាប់រំដោះទឹកជំនន់ទឹកភ្លៀងក្នុងក្រុងតាខ្មៅ និងសហការជួសជុលកំណាត់ផ្លូវលេខ២១បេ(១១៥) ជាមួយក្រសួងសាធារណការ និងដឹកជញ្ជូន។ ដូចនេះ មន្ទីរសូមធ្វើការបិទចរាចររថយន្តដឹកទំនិញធុនធ្ងន់ទាំងអស់ នៅលើកំណាត់ផ្លូវជាតិលេខ២១បេ(១១៥) ចាប់ពីផ្លូវជាតិលេខ២១អា ដល់ផ្លូវជាតិលេខ២ ស្ថិតក្នុងក្រុងតាខ្មៅ ខេត្តកណ្ដាលចន្លោះ ៦៖០០នាទីល្ងាច ដល់ម៉ោង ៣៖០០នាទីទាបភ្លឺ ចាប់ពីថ្ងៃទី២២ ដល់ថ្ងៃទី៣១ ខែធ្នូ ឆ្នាំ២០២១ ដោយឡែកចំពោះរថយន្តគ្រួសារ(ទេសចរណ៍) អាចធ្វើដំណើរបានជាធម្មតា។

អាស្រ័យហេតុនេះ សូមម្ចាស់រថយន្តដឹកទំនិញធុនធ្ងន់ទាំងអស់ ព្រមទាំងស្ថាប័នមានសមត្ថកិច្ចពាក់ព័ន្ធមេត្តាជ្រាប និងជួយចូលរួមសហការអនុវត្តតាមខ្លឹមសារសេចក្ដីជូនដំណឹងនេះប្រកបដោយប្រសិទ្ធភាព ៕

ប្រភព៖ មន្ទីរសាធារណការ និងដឹកជញ្ជូន ខេត្តកណ្ដាល