ក្រសួងទេសចរណ៍ ចេញសារាចរលើកលែងកាតព្វកិច្ចពាក់ម៉ាស់ នៅតាមទីតាំងអាជីវកម្មសេវាកម្មទេសចរណ៍
រាជធានីភ្នំពេញ៖ យោងតាមការចុះផ្សាយរបស់ ក្រសួងទេសចរណ៍ នៅថ្ងៃទី២៧ ខែមេសា ឆ្នាំ២០២២បានឲ្យដឹងថា ដោយអនុវត្តតាមសារសម្លេងពិសេសរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី២៥ ខែមេសា ឆ្នាំ២០២២ ក្រសួងទេសចរណ៍ បានចេញសារាចរណែនាំលេខ០០៥ សរណន ចុះថ្ងៃទី២៦ ខែមេសា ឆ្នាំ២០២២ ស្តីពី “ការលើកលែងកាតព្វកិច្ចពាក់ម៉ាស់” នៅតាមអាជីវកម្មសេវាកម្មទេសចរណ៍។
រាជរដ្ឋាភិបាលបានសម្រេចឲ្យលើកលែង “កាតព្វកិច្ចពាក់ម៉ាស់” នៅទូទាំងប្រទេស ចំពោះទៅកន្លែងសាធារណៈនិងទីកន្លែងចំហរនានា ក្រៅអំពីកន្លែងបិទជិត។ ដូចនេះ នៅគ្រប់មូលដ្ឋានអាជីវកម្មសេវាកម្មទេសចរណ៍ទាំងអស់ ភ្ញៀវទេសចរជាតិ និងអន្តរជាតិ បុគ្គលិកបម្រើការក្នុងវិស័យទេសចរណ៍ អាចជ្រើសរើសដោយខ្លួនឯងពីការបន្តពាក់ម៉ាស់ ឬមិនពាក់ម៉ាស់ នៅក្នុងបរិវេណទីកន្លែងសាធារណៈ និងទីកន្លែងចំហរនានា។
ដោយឡែកនៅក្នុងបរិវេណកន្លែងបិទជិតដូចជា៖ បន្ទប់ប្រជុំបិទជិតមានម៉ាស៊ីត្រជាក់ បន្ទប់ខារ៉ាអូខេ ក្លឹបកម្សាន្ត បន្ទាប់ម៉ាស្សា និងទីកន្លែងផ្ដល់សេវាកម្មទេសចរណ៍ផ្សេងទៀតដែលស្ថិតក្នុងទម្រង់ជាបន្ទប់បិទជិតត្រូវបន្តអនុវត្ត “កាតព្វកិច្ចពាក់ម៉ាស់” ៕
ខាងក្រោមនេះ ជាសារាចរណែនាំស្តីពី “ការលើកលែងកាតព្វកិច្ចពាក់ម៉ាស់” នៅតាមអាជីវកម្មសេវាកម្មទេសចរណ៍៖
