អាមេរិក៖ រថយន្តដ៏ទំនើបរបស់តារាហូលីវូដម្នាក់គឺលោក Owen Wilson ត្រូវបានចតចោលជាងមួយសប្តាហ៍មកហើយ ក្រោយចោរបានធ្វើសកម្មភាពលួចកង់របស់រថយន្តយកទៅបាត់។ យោងតាមការចុះផ្សាយរបស់បណ្តាញសារព័ត៌មាន  Daily Mail បានឲ្យដឹងថា ករណីលួចកង់រថយន្តនោះបានកើតឡើងតាំងពីយប់ថ្ងៃទី ២៨ ខែឧសភាម្លេះ តែដំណឹងនេះទើបទទួលបានការចាប់អារម្មណ៍ខ្លាំងនៅតាមបណ្តាញសារព័ត៌មាន ក្រោយគេបានកត់សម្គាល់ថា រថយន្តដែលបានបាត់កង់នោះគឺជារថយន្តរបស់កំពូលតារាសម្តែង Owen Wilson។

ប្រភពខាងលើបានបន្តថា ករណីចោរលួចកង់រថយន្តនេះបានកើតឡើងនៅក្នុងទីក្រុង Santa Monica រដ្ឋ California សហរដ្ឋអាមេរិក និងបានកើតឡើងនៅចំណុចមុខផ្ទះរបស់លោក Owen Wilson តែម្តង។ រថយន្តទំនើបនោះគឺជាប្រភេទរថយន្តដើរដោយថាមពលអគ្គិសនីម៉ាក Tesla មានតម្លៃប្រហែលជា ១០០,០០០ ដុល្លារអាមេរិក ខណៈសម្បកកង់រថយន្តនិងយ៉ាន់ដែលត្រូវបានចោរលួចយកទៅនោះមានតម្លៃសរុបប្រហែលជា ៤,០០០ដុល្លារ។ បើតាមរបាយការណ៍របស់អង្គភាពបូលិសនៃរដ្ឋ California បានបង្ហាញថា កាលពីឆ្នាំ ២០២១កន្លងទៅ ករណីលួចកង់រថយន្តនៅទូទាំងរដ្ឋបានកើតមានឡើងចំនួន ៣៩,៨៩៤ដង ហើយតួលេខនេះមានការកើនឡើង ១៧%ផងដែរបើធៀបទៅនឹងឆ្នាំ ២០២០៕

អត្ថបទ៖ ភក្តី

ប្រភព៖ Daily Mail