ក្រសួងប្រៃសណីយ៍ ជូនដំណឹង ស្ដីពីបញ្ហាសេវាទូរសព្ទចល័ត សេវាអ៊ីនធឺណិត និងវិធានការដោះស្រាយ

រាជធានីភ្នំពេញ៖ យោងតាមការចុះផ្សាយរបស់ ក្រសួងប្រៃសណីយ៍ និងទូរគមនាគមន៍ នៅថ្ងៃទី០៨ ខែកក្កដា ឆ្នាំ២០២២ សូមជម្រាបជូនសាធារណជនទាំងអស់ មេត្តាជ្រាបថា ចាប់តាំងពីខែមេសា ឆ្នាំ២០២០ មក ក.ប.ទ. បានដាក់ចេញនូវយន្តការកែទម្រង់ស៊ីជម្រៅផ្ទៃក្នុងនៅគ្រប់អង្គភាពចំណុះ និងនៅនិយ័តករទូរគមនាគមន៍កម្ពុជា (ន.ទ.ក.)។

ក្នុងការកែទម្រង់នោះ មានការរៀបចំពង្រឹងសមត្ថភាពមន្ត្រីរាជការ ការពង្រឹងការគ្រប់គ្រងហិរញ្ញវត្ថុផ្ទៃក្នុង ការពង្រឹងប្រសិទ្ធភាពនិងតម្លាភាពលើការប្រមូលចំណូលនិងទារបំណុល ការអភិវឌ្ឍប្រព័ន្ធបច្ចេកវិទ្យាឌីជីថល ការរៀបចំលិខិតបទដ្ឋានគតិយុត្តពាក់ព័ន្ធ និងការពង្រឹងកិច្ចសហប្រតិបត្តិការជាមួយដៃគូអភិវឌ្ឍន៍ ព្រមទាំងបានចូលរួមជាមួយរាជរដ្ឋាភិបាល ក្នុងកិច្ចខិតខំប្រឹងប្រែងទប់ស្កាត់ការរីករាលដាលជំងឺកូវីដ-១៩។

បន្ថែមពីលើនេះ ក.ប.ទ. បានចាត់ទុកការការពារផលប្រយោជន៍និងសិទ្ធិរបស់អ្នកប្រើប្រាស់ និងការពង្រឹងគុណភាពសេវាទូរគមនាគមន៍ ជាការងារអាទិភាពបំផុត ដើម្បីធានាថា អ្នកប្រើប្រាស់ទទួលបានសេវាប្រកបដោយគុណភាពនិងតម្លៃសមរម្យ។ បើទោះបីជាកិច្ចខិតខំប្រឹងប្រែងទាំងនេះទទួលបានជោគជ័យលើផ្នែកជាច្រើនក្នុងវិស័យទូរគមនាគមន៍ក៏ដោយ ក៏ប៉ុន្តែកិច្ចការមួយចំនួននៅមិនទាន់កែលំអឱ្យបានល្អប្រសើរនៅឡើយ ដូចជា បញ្ហាគុណភាពសេវាទូរសព្ទចល័តនិងសេវាអ៊ីនធឺណិត។ ដើម្បីដោះស្រាយបញ្ហានេះ ក.ប.ទ. បានសិក្សា ស្រាវជ្រាវ និងពិភាក្សាជាមួយភាគីពាក់ព័ន្ធ ដោយកំណត់មូលហេតុមួយចំនួន ដែលបណ្តាលឱ្យគុណភាពសេវាទូរសព្ទចល័តនិងសេវាអ៊ីនធឺណិតរអាក់រអួល ឬដំណើរការមិនបានល្អ ឬគ្មានសេវា ដូចខាងក្រោម៖

ក. បញ្ហាសេវាទូរសព្ទចល័ត៖
១-ប្រតិបត្តិករទូរសព្ទចល័តមួយចំនួននៅបន្តប្រើប្រាស់បច្ចេកវិទ្យានិងឧបករណ៍ដែលមិនទាន់ធ្វើទំនើបកម្មឱ្យទាន់បច្ចេកវិទ្យាតាមស្តង់ដារ នៅតាមស្ថានីយមួយចំនួន។
២-ការវិនិយោគបន្ថែមដោយប្រតិបត្តិករមួយចំនួនលើការកែសម្រួល ការបង្កើនសមត្ថភាព និងការសាងសង់ស្ថានីយអង់តែនបន្ថែម នៅមានកម្រិតនៅឡើយ ដែលមិនស្របនឹងកំណើននៃចំនួនអ្នកប្រើប្រាស់តាមតំបន់នៃស្ថានីយអង់តែនទាំងនោះ។
៣-កំណើននៃសំណង់អគារខ្ពស់ៗ ក្នុងប៉ុន្មានឆ្នាំចុងក្រោយនេះ ធ្វើឱ្យទីតាំងម្ខាងទៀតនៃអគារដែលពុំមានស្ថានីយអង់តែន ពុំអាចទទួលសេវាបានល្អ ដូចនេះ ប្រតិបត្តិករត្រូវសាងសង់ស្ថានីយអង់តែននៅម្ខាងទៀតនៃអគារ។ ចំណែកផ្ទៃខាងក្នុងនៃអគារ សេវាត្រូវបានបាត់បង់យ៉ាងតិច ៣០-៤០% ដែលទាមទារឱ្យមានការបំពាក់ប្រព័ន្ធអាយប៊ីអេស (In-Building Solution) នៅក្នុងអគារ ប៉ុន្តែខាងក្នុងអគារភាគច្រើនពុំបានធ្វើដូច្នោះទេ។
៤-ក្នុងពេលដែលប្រតិបត្តិករបាននិងកំពុងបន្តវិនិយោគបន្ថែម ដើម្បីធានាគុណភាពសេវា ក៏មានកំណើនយ៉ាងគំហុកនៃការប្រើប្រាស់សេវាទូរសព្ទចល័តនិងសេវាអ៊ីនធឺណិតផងដែរ ជាពិសេសក្នុងអំឡុងពេលនៃការរីករាលដាលនៃជំងឺកូវីដ-១៩។
៥-បើទោះបីជាមានស្ថានីយអង់តែនដែលអាចផ្តល់សេវាគ្រប់គ្រាន់ក៏ដោយ ប៉ុន្តែដើម្បីសន្សំការចំណាយ ប្រតិបត្តិករមួយចំនួនអាចបន្ថយចំណុះសមត្ថភាពនៃឧបករណ៍បញ្ជូននិងទទួលសេវា។
៦-ស្ថានីយអង់តែនជាច្រើនបំពាក់ឧបករណ៍ដែលគ្មានការទទួលស្គាល់យថាប្រភេទពី ន.ទ.ក. ឬឧបករណ៍កែច្នៃដែលមិនស្របតាមស្តង់ដាបច្ចេកទេស។
៧-នៅតាមបណ្តោយផ្លូវជាតិ ឬនៅតាមបណ្តាខេត្ត ស្ថានីយអង់តែនភាគច្រើនត្រូវបានសាងសង់ នៅតែតំបន់ទីប្រជុំជន ដោយពុំបានសាងសង់នៅចន្លោះតំបន់ទីប្រជុំជន។
៨-ដើម្បីបង្កើនសេវាទូរសព្ទចល័ត ប្រជាពលរដ្ឋមួយចំនួនបានដំឡើងឧបករណ៍បង្កើនកម្លាំងសេវា និង/ឬឧបករណ៍ពង្រីកសេវា (Signal Booster/Repeater) ដោយខ្លួនឯង ដែលឧបករណ៍នេះត្រូវបាននាំចូលដោយខុសច្បាប់ និងពុំមានវិញ្ញាបនបត្រទទួលស្គាល់យថាប្រភេទពី ន.ទ.ក. ដែលបណ្តាលឱ្យមានការឆ្លងរំខានសេវានៅតំបន់ជុំវិញខ្លួនរស់នៅ។
៩-ការនាំចូលទូរសព្ទមួយទឹកដែលគ្មានគុណភាព ឬទូរសព្ទដែលពុំមានវិញ្ញាបនបត្រទទួលស្គាល់យថាប្រភេទពី ន.ទ.ក. និងខុសពីស្តង់ដាបច្ចេកទេស ឬទូរសព្ទក្លែងក្លាយ។
១០-សេវាទូរសព្ទចល័តនិងសេវាអ៊ីនធឺណិតនៅកម្ពុជាមានតម្លៃទាប ធៀបនឹងតម្លៃសេវាទូរសព្ទនៅបណ្តាប្រទេសក្នុងតំបន់។
១១-ប្រតិបត្តិករបានដាក់ចេញនូវកញ្ចប់ដូរលុយដែលផ្ដល់ចំណុះសមត្ថភាពអ៊ីនធឺណិតច្រើនលើសលុប ធ្វើឱ្យអ្នកប្រើប្រាស់ប្រើដោយសេរី ដែលលើសពីតម្រូវការជាក់ស្តែង ជាអាទិ៍ ការមើលវីដេអូតាមយូធូប (YouTube) និងបណ្ដាញសង្គមផ្សេងៗ ការលេងហ្គេមអនឡាញ ការទាញយកទិន្នន័យ (Download) និងកំណើននៃការប្រើប្រាស់សេវាអ៊ីនធឺណិតនានា ដែលនាំឱ្យមានភាពកកស្ទះនិងលើសពីចំណុះសមត្ថភាពផ្គត់ផ្គង់។

ខ.បញ្ហាសេវាអ៊ីនធឺណិត៖
១.សមត្ថភាពសេវាអ៊ីនធឺណិតមិនគ្រប់គ្រាន់ដោយសារ៖ ១) អ្នកប្រើប្រាស់ទិញសេវាអ៊ីនធឺណិតដែលមានចំណុះសមត្ថភាពសម្រាប់ឧបករណ៍ ១-២ តែប្រើរហូតដល់ ៤-៥ ឧបករណ៍ក្នុងពេលតែមួយ និង/ឬ ២) ប្រតិបត្តិករផ្តល់សេវាអ៊ីនធឺណិតផ្គត់ផ្គង់ចំណុះសមត្ថភាពមិនគ្រប់តាមចំនួនដែលអ្នកប្រើប្រាស់បានចុះកិច្ចសន្យាទិញ។
២.ប្រតិបត្តិករផ្តល់សេវាអ៊ីនធឺណិតដំឡើងនិងប្រើប្រាស់ខ្សែកាបអុបទិកនិងគ្រឿងសម្ភារៈបរិក្ខា ពុំមានគុណភាពនិងពុំស្របតាមស្តង់ដាបច្ចេកទេស។
៣.ការអភិវឌ្ឍនិងការស្ថាបនាកែលំអផ្លូវជាតិ ផ្លូវក្រុង និងផ្លូវទីប្រជុំជន បណ្តាលឱ្យប៉ះពាល់ដល់ខ្សែកាបអុបទិកនៅតាមបណ្តោយដងផ្លូវទាំងនោះ។
៤.ក្នុងរយៈពេលនៃការរីករាលដាលជំងឺកូវីដ-១៩ ទំហំនៃការប្រើប្រាស់សេវាអ៊ីនធឺណិតមានការកើនឡើងប្រមាណ ៥០% ក៏ប៉ុន្តែការវិនិយោគលើការពង្រីកបណ្តាញរបស់ប្រតិបត្តិករនៅមានកម្រិតនិងមិនឆ្លើយតបតាមកំណើនដ៏គំហុកនេះ។

គ.បញ្ហាសេវាទូរសព្ទចល័តនិងសេវាអ៊ីនធឺណិតនៅតាមបុរី៖
១.ការកើនឡើងយ៉ាងគំហុកនៃការអភិវឌ្ឍបុរី ដោយគ្មានមាត្រដ្ឋានបច្ចេកទេសច្បាស់លាស់និងត្រឹមត្រូវ ឬមិនបានលៃទុកទីតាំងសម្រាប់ដំឡើងស្ថានីយអង់តែនក្នុងបុរី។ បុរីខ្លះទៀត មានការប្តឹងតវ៉ាមិនឱ្យសាងសង់ស្ថានីយអង់តែន ដោយលើកយកហេតុផលពុំសមស្រប ដូចជា ខ្លាចប៉ះពាល់ដល់សុខភាព ឬប៉ះពាល់ដល់តម្លៃអចលនទ្រព្យ។
២.បុរីមួយចំនួនត្រូវបានសាងសង់ ដោយពុំបានរៀបចំប្រព័ន្ធហេដ្ឋារចនាសម្ព័ន្ធទូរគមនាគមន៍ក្រោមដីទុកជាមុន ឬពុំបានរៀបចំឱ្យបានត្រឹមត្រូវតាមបទដ្ឋានបច្ចេកទេស ឬបានរៀបចំដែរ ប៉ុន្តែមិនបានល្អ។
៣.បុរីមួយចំនួនបានផ្តល់សិទ្ធិផ្តាច់មុខសម្រាប់តែប្រតិបត្តិករមួយ ដែលពុំទទួលខុសត្រូវក្នុងការផ្តល់សេវាឱ្យបានល្អ ដោយសមត្ថភាពនៃការផ្គត់ផ្គង់សេវាមិនសមាមាត្រនឹងចំនួនប្រជាជននៅក្នុងបុរី ឧទាហរណ៍ បណ្តាញខ្សែកាបអុបទិកដែលមានចំណុះសមត្ថភាពផ្គត់ផ្គង់ ១០០ គ្រួសារ ប៉ុន្តែបែរជាត្រូវផ្គត់ផ្គង់រហូតដល់ ៣០០-៥០០ គ្រួសារ។
៤.ជាទូទៅ សេវាទូរសព្ទចល័តមានគ្របដណ្តប់នៅលំហខាងក្រៅ ប៉ុន្តែក្នុងអគារឬលំនៅដ្ឋាន ដែលមានបន្ទប់ឬជញ្ជាំងច្រើន សេវាមិនអាចចូលទៅដល់។ នៅក្នុងបុរី មានការប្រើប្រាស់ឧបករណ៍បង្កើនកម្លាំងសេវា និង/ឬឧបករណ៍ពង្រីកសេវា (Signal Booster/Repeater) យ៉ាងច្រើន។

ដើម្បីដោះស្រាយបញ្ហាទាំងនេះ ក.ប.ទ. បានដាក់ចេញវិធានការ ដូចខាងក្រោម៖
១.ចាត់តាំងក្រុមការងារចំនួន ៥ តំបន់នៅទូទាំងប្រទេស ដោយតំបន់នីមួយៗទទួលបន្ទុក ៤-៥ ខេត្ត ដើម្បីចុះពិនិត្យ ស្រង់ទិន្នន័យ និងរាប់ចំនួនស្ថានីយអង់តែន ដែលប្រតិបត្តិករពុំដែលផ្តល់ជូន ទោះបីជា ក.ប.ទ. បានស្នើសុំយ៉ាងណាក៏ដោយ។ ជាលទ្ធផល ក.ប.ទ. កំណត់បានទីតាំងនៃគ្រប់ស្ថានីយអង់តែន ការបំពាក់គ្រឿងសម្ភារៈបរិក្ខានិងបច្ចេកវិទ្យាដែលបានប្រើប្រាស់។ ជំហានបន្ទាប់ ក.ប.ទ. នឹងជំរុញការផ្លាស់ប្តូរគ្រឿងសម្ភារៈបរិក្ខានិងបច្ចេកវិទ្យា ព្រមទាំងការសាងសង់ស្ថានីយអង់តែនបន្ថែម ដើម្បីបង្កើនគុណភាពសេវា។
២.ចាត់តាំងក្រុមការងារចំនួន ៨ សម្រាប់ចុះពង្រឹងគុណភាពសេវានៅតាមបុរីក្នុងរាជធានីភ្នំពេញ ដោយបញ្ចប់កិច្ចសន្យាផ្តល់សិទ្ធិផ្តាច់មុខដល់ប្រតិបត្តិករណាមួយក្នុងការផ្គត់ផ្គង់សេវាអ៊ីនធឺណិត និងស្នើសុំកិច្ចសហការពីម្ចាស់បុរីក្នុងការជំរុញគុណភាពសេវា។
៣.បានទិញឧបករណ៍វាស់ស្ទង់សេវាដែលបំពាក់លើរថយន្ត (Drive Test) ចំនួន ៥ គ្រឿង សម្រាប់ធ្វើការវាស់ស្ទង់គុណភាពសេវា ដើម្បីជំរុញឱ្យប្រតិបត្តិករកែលំអសេវា ឬវិនិយោគបន្ថែម។
៤.ដាក់ឱ្យដំណើរការកម្មវិធីទូរសព្ទ MPTC Speed Test សម្រាប់អ្នកប្រើប្រាស់អាចវាស់ល្បឿនសេវាទូរសព្ទនិងសេវាអ៊ីនធឺណិតដោយខ្លួនឯង និងមានសិទ្ធិប្តឹងមក ន.ទ.ក. ដើម្បីដោះស្រាយ។
៥. “ប្រកាសស្តីពីគុណភាពសេវាទូរគមនាគមន៍” នឹងត្រូវដាក់ឱ្យអនុវត្តនាពេលឆាប់ៗខាងមុខ ដើម្បីដាក់កាតព្វកិច្ចលើប្រតិបត្តិករឱ្យពង្រឹងគុណភាពសេវានិងបណ្តាញទូរគមនាគមន៍របស់ខ្លួន ក្នុងគោលដៅការពារផលប្រយោជន៍របស់អ្នកប្រើប្រាស់។

ទន្ទឹមនឹងនេះ ក.ប.ទ. សូមអំពាវនាវដល់ប្រជាពលរដ្ឋទាំងអស់ បញ្ឈប់ការប្រើប្រាស់ឧបករណ៍បង្កើនកម្លាំងសេវា និង/ឬឧបករណ៍ពង្រីកសេវា (Signal Booster/Repeater) ពីព្រោះឧបករណ៍ទាំងនេះកំពុងឆ្លងរំខាន និងប៉ះពាល់គុណភាពសេវា។ បន្ថែមលើនេះទៀត ក.ប.ទ. ក៏សំណូមពរដល់អ្នកពាក់ព័ន្ធទាំងអស់ ឱ្យបញ្ឈប់ការនាំចូលឧបករណ៍បង្កើនកម្លាំងសេវា និង/ឬឧបករណ៍ពង្រីកសេវាគ្រប់ប្រភេទ ដែលពុំមានការទទួលស្គាល់យថាប្រភេទពី ន.ទ.ក. ជៀសវាងការប្រឈមនឹងវិធានការច្បាប់។
ក.ប.ទ. ប្តេជ្ញាបន្តលុបបំបាត់រាល់បាតុភាពអសកម្មនិងអវិជ្ជមានក្នុងវិស័យទូរគមនាគមន៍ ដោយអនុវត្តតាមច្បាប់ស្តីពីទូរគមនាគមន៍និងលិខិតបទដ្ឋានគតិយុត្តពាក់ព័ន្ធ។ ក.ប.ទ. សង្ឃឹមជឿជាក់យ៉ាងមុតមាំលើការចូលរួមសហការពីប្រតិបត្តិករទូរគមនាគមន៍ គ្រប់ភាគីពាក់ព័ន្ធ និងអ្នកប្រើប្រាស់ទាំងអស់ ដើម្បីធ្វើឱ្យសេវាទូរសព្ទចល័តនិងសេវាអ៊ីនធឺណិតបានល្អប្រសើរឡើង។

អាស្រ័យហេតុនេះ សូម ប្រតិបត្តិករទូរគមនាគមន៍ គ្រប់ភាគីពាក់ព័ន្ធ និងសាធារណជនទាំងអស់ មេត្តាជ្រាប និងចូលរួមសហការ៕

ប្រភព៖ ក្រសួងប្រៃសណីយ៍ និងទូរគមនាគមន៍ – Ministry of Post and Telecommunications