ក្រសួងសុខាភិបាល ចេញសារអប់រំសុខភាព ស្ដីពីផលប៉ះពាល់បារីអេឡិចត្រូនិកលើសុខភាព

រាជធានីភ្នំពេញ៖ យោងតាមការចុះផ្សាយរបស់ ក្រសួងសុខាភិបាល នៅថ្ងៃទី២៩ ខែកក្កដា ឆ្នាំ២០២២ បានចេញសារអប់រំសុខភាព​ ស្តីពីផលប៉ះពាល់បារីអេឡិចត្រូនិកលើសុខភាព។

តើអ្វីទៅជាបារីអេឡិចត្រូនិក? ជាឧបករណ៍ដែលបង្កើតឱ្យមានជាចំហាយ ឬផ្សែង ដោយកំដៅវត្ថុរាវដែលជាធម្មតា គឺជាសារធាតុ នីកូទីន ហើយវាមាននៅក្នុងបារី និងផលិតផលថ្នាំជក់ផ្សេងទៀត។ ជាទូទៅ បារីអេឡិចត្រូនិកមានទម្រង់ និងទំហំផ្សេងៗគ្នាដែលមានផ្នែកផ្ទុកអគ្គិសនី ផ្នែកដុតកំដៅ និងផ្នែកវត្ថុរាវ។ បារីអេឡិចត្រូនិកខ្លះមានរូបរាង ដូចបារីធម្មតា ឧបករណ៍អង្គចងចាំ (USB Sticks) ឬខៀវ។ បារីអេឡិចត្រូនិក មានឈ្មោះហៅជាច្រើន ដូចជា៖ E-cigs, E-hooknhs, Mods, Vape Pens, Vapes, Tank System and ENDS ( Electronic Nicotine Delivery System)។ វត្ថុរាវដែលមាននៅក្នុង បារីអេឡិចត្រូនិក អាចជាសារធាតុ ផ្សេងទៀត ដែលមិនមានជានីកូទីនផងដែរ។

បារីអេឡិចត្រូនិក អាចបណ្ដាលឱ្យមានផលប៉ះពាល់សុខភាពរួមមាន៖

-សារធាតុនីកូទីនបណ្ដាលឱ្យមានភាពញៀនខ្លាំង។
-សារធាតុនីកូទីន បណ្ដាលឱ្យមានភាពពុលដល់ទារកក្នុងផ្ទៃ។
-សារធាតុនីកូទីន បណ្ដាលឱ្យមានហានិភ័យដល់ការលូតលាស់ខួរក្បាលរបស់កុមារ និងក្មេងជំទង់។
-សារធាតុនីកូទីន បណ្ដាលឱ្យមានគ្រោះថ្នាក់ដល់អ្នកមានផ្ទៃពោះ និងការលូតលាស់ទារកក្នុងផ្ទៃ។
-ក្រៅពីសារធាតុនីកូទីន បារីអេឡិចត្រូនិក មានសារធាតុគីមីផ្សេងទៀតដែលអាច បណ្ដាលឱ្យមានជំងឺមហារីក។
-ចំពោះអ្នកដែលនៅជុំវិញ អ្នកដែលកំពុងជក់បារីអេឡិចត្រូនិក ក៏មានការទទួលរងផលប៉ះពាល់សុខភាពផងដែរ ៕

ប្រភព៖ ក្រសួងសុខាភិបាលនៃព្រះរាជាណាចក្រកម្ពុជា