នេះហើយសេចក្តីស្រឡាញ់របស់ម្តាយ! ម្តាយជនជាតិឥណ្ឌាម្នាក់ហ៊ាន ប្រយុទ្ធជាមួយខ្លាដោយដៃទទេ ដើម្បីជួយសង្គ្រោះកូនតូចពីចង្កូមដ៏មុតស្រួចរបស់វា

ឥណ្ឌា៖ យោងតាមទីភ្នាក់ងារសារព័ត៌មាន Thairath បានរាយការណ៍កាលពីថ្ងៃ ពុធ ទី៧ខែកញ្ញាថា មានស្ត្រីជនជាតិឥណ្ឌាម្នាក់ ដែលមានឈ្មោះថា Archana Chowdari បាននៅជាមួយកូនប្រុសអាយុទើបតែ ១៥ខែ នៅក្នុងវាលស្រែមួយ ក្នុងភូមិមួយ ដែលស្ថិតនៅគែមឧទ្យានជាតិ Bandhavgarh ក្នុងរដ្ឋ Madhya Pradesh ដោយកាល​ពី​ថ្ងៃ​អាទិត្យមុនមានសត្វ​ខ្លា​មួយ​ក្បាល​បាន​រត់ចេញមកពីគុម្ពឈើហើយរត់សំដៅមកកាន់កូនប្រុសនាង។
ដោយសត្វខ្លានេះបាន​ខាំ​ក្បាល​កូនប្រុសរបស់នាង ហើយ​ព្យាយាម​ទាញ​វា​ចេញទៅ ប៉ុន្តែ​ម្តាយ​បាន​ស្ទុះ​ទៅ​សង្កត់ពីលើខ្លាក៏ដូចជាតស៊ូជាមួយវា ហើយក៏បាន​ស្រែក​ឲ្យ​គេ​ជួយ លុះប៉ុន្មាននាទីក្រោយមក មានអ្នក​ភូមិ​ក្បែរ​នោះ​មួយ​ក្រុម​បាន​មក​ជួយ​សង្គ្រោះ​ព្រមទាំងកាន់​ឈើ​មួយ​ដុំ​នៅ​ក្នុង​ដៃ ហើយក៏​អាច​ដេញ​ខ្លា​បានដោយ​ជោគជ័យ។