ប្រទេសថៃព្រមានពីគ្រោះទឹកជំនន់ភ្លាមៗ សម្រាប់ខេត្តចំនួន ២៤ នៅទូទាំងប្រទេស

ថៃ៖ ខេត្តចំនួន ២៤ ត្រូវបានព្រមានពីទឹកជំនន់ភ្លាមៗ ទឹកជោរពីទន្លេ និង ពីប្រឡាយ ចាប់ពីថ្ងៃសៅរ៍ រហូតដល់ថ្ងៃអង្គារសប្តាហ៍ក្រោយ ដោយសារភ្លៀងធ្លាក់ខ្លាំង ដែលបង្កដោយខ្យល់មូសុង និងខ្យល់មូសុងនិរតី។ ការិយាល័យធនធានទឹកជាតិថៃ (ONWR) បានចេញការព្រមាននៅថ្ងៃព្រហស្បតិ៍នេះ ដោយលើកឡើងពីការព្យាករណ៍អាកាសធាតុដោយនាយកដ្ឋានឧតុនិយម ដែលបាននិយាយថា ប្រទេសថៃភាគច្រើននឹងមានភ្លៀងធ្លាក់ខ្លាំងរហូតដល់ថ្ងៃអាទិត្យ។ នេះ​ដោយសារ​ខ្យល់​មូសុង​ មានពាសពេញ​ភាគខាងជើង និង​ឦសាន ខណៈ​ខ្យល់មូសុង​និរតី​ នៅ​លើ​សមុទ្រ​ Andaman និង​ឈូងសមុទ្រ​ នឹង​មាន​កម្លាំងកាន់តែ​ខ្លាំង។

ONWR បានព្រមានថា ចាប់ពីថ្ងៃទី១៧ ដល់ថ្ងៃទី២១ ខែកញ្ញា តំបន់មួយផ្នែករបស់ប្រទេសថៃ នឹងកើតមានជំនន់ទឹកភ្លៀង និងទឹកជោរពីទន្លេ ស្របពេលដែលខ្លួនស្នើឱ្យប្រជាពលរដ្ឋរស់នៅក្បែរមាត់ទន្លេ និងអាងទន្លេ អនុវត្តតាមការធ្វើបច្ចុប្បន្នភាព នៃការប្រកាសពីអាកាសធាតុ និងកម្រិតទឹក។ ខាងក្រោមនេះគឺជាតំបន់ដែលងាយនឹងរងគ្រោះតាមសេចក្ដីប្រកាស៖

– ភាគខាងជើង៖ ខេត្តឈៀងម៉ៃ, ព្រែ, ណាន, ឡាំប៉ាង, កំផែងផេត, តាក, ឧត្តារ៉ាឌីត, វិស្ណុលោក និង ផាត់ចាប៊ុន។
– ភាគឦសាន៖ ខេត្តឡយ, បឹងកាន, ខនកែន, កាឡាស៊ីន, ឆៃយ៉ាភូមិ, អាមណាត ចារឿន, អ៊ូប៊ុន រ៉ាថានី, យ៉ាសុថុន, ស៊ីសាកេត និង នគររាជសីមា។
– តំបន់កណ្តាល៖ កានចាន់បុរី និង រាជបុរី ។
– ខាងលិច៖ ប្រាជ្ញគីរីខាន់ និងភូតឆាបូរី
– ខាងកើត៖ ចន្ថាបុរី និងត្រាត។

ការិយាល័យបានស្នើឱ្យអាជ្ញាធរមូលដ្ឋាន រៀបចំផែនការជម្លៀសប្រជាជនដែលរស់នៅក្បែរទន្លេ និងតំបន់ដែលងាយរងគ្រោះដោយទឹកជំនន់ និងចេញការព្រមានជាមុន ដើម្បីទុកពេលគ្រប់គ្រាន់សម្រាប់ប្រជាជនដើម្បីគេចផុតពីទឹកជំនន់ដែលរំពឹងទុក៕

អត្ថបទ៖ លីដា
ប្រភព៖ The Nation Thailand