តារាល្បីៗ៣នាក់ កំពុងតែប្ដឹងក្រុមហ៊ុនផលិតហ្គេម «Fortnite» ដោយពួកគេចោទថា វាជាចោរកម្មលួចកម្មសិទ្ធិបញ្ញារបស់ពួកគេ។ យោងតាមមេធាវីលោក David Hecht ដែលតំណាងឱ្យ Ribeiro, អ្នកចម្រៀងរ៉េប 2Milly និង Russell Horning (Backpack Kid) បាននិយាយថា មិនមែនត្រឹមតែតារាល្បីទាំង៣នេះទេដែលកំពុងប្តឹងក្រុមហ៊ុនផលិតហ្គេម «Fortnite» នោះទេ គឺជារៀងរាល់ថ្ងៃគាត់តែងទទួលបានការហៅទូរស័ព្ទអំពីអ្វីដែលកំពុងកើតឡើងជាច្រើន។ វាមិនច្បាស់ទេថាតើលោក David Hecht សំដៅទៅលើអ្វី ប៉ុន្តែប្រហែលជាគាត់ចង់សំដៅអំពីក្បាច់រាំនៅក្នុងហ្គេម Fortnite នេះ។

យ៉ាងណាមិញ «Fortnite» មិនត្រឹមតែប្រើប្រាស់ក្បាច់រាំអ្នកទាំង៣ខាងលើនោះទេ សូម្បីតារាល្បីៗ ដូចជា Julia Louis-Dreyfus (ដែលក្បាច់រាំដ៏ល្បីល្បាញរបស់គាត់ គឺមានលក្ខណៈស្រដៀងគ្នានឹង “Jubilation” នៅក្នុង “Fortnite”) និង Psy (ម្ចាស់បទ “Gangnam Style” ដែលក្បាច់រាំរបស់គាត់មានលក្ខណៈស្រដៀងគ្នាទៅនឹង “Ride the Pony”) ក៏ «Fortnite» យកមកប្រើប្រាស់ដែរ ហើយយើងក៏មិនដឹងថា «Fortnite» ប្រើប្រាស់ដោយមានការអនុញ្ញាត ឬអត់ ហើយខណៈពេលនេះហ្គេម Fortnite នៅមិនទាន់បានផ្តល់មតិយោបល់មកលើវិវាទដែលកំពុងតែកើតមាននោះទេ៕

អត្ថបទ៖ លីដា
ប្រភព៖​ businessinsider