ខេត្តសៀមរាប៖ យោងតាមការចុះផ្សាយរបស់ រដ្ឋបាលខេត្តសៀមរាប នៅថ្ងៃទី២១ ខែវិច្ឆិកា ឆ្នាំ២០២២ បានចេញសេចក្ដីជូនដំណឹងស្តីពី ការបញ្ចៀសការធ្វើដំណើរឆ្លងកាត់ខ្សែផ្លូវមួយចំនួនអំឡុងពេលការធ្វើដំណើររបស់ប្រតិភូចូលរួមប្រជុំរដ្ឋមន្ត្រីការពារជាតិអាស៊ាន។

ដើម្បីរក្សាសន្តិសុខ សណ្តាប់ធ្នាប់របស់ប្រតិភូអាស៊ានដែលអញ្ជើញមកចូលរួមប្រជុំចង្អៀតរដ្ឋមន្ត្រីការពារជាតិនិងកិច្ចប្រជុំរដ្ឋមន្ត្រីការពារជាតិអាស៊ាន-បូកនៅខេត្តសៀមរាបនាថ្ងៃទី២១-២៣ ខែវិច្ឆិកា ឆ្នាំ២០២២នេះ គណៈបញ្ជាការឯកភាពរដ្ឋបាលខេត្តនឹងផ្អាកការធ្វើចរាចរណ៍លើកំណាត់ផ្លូវជាតិលេខ៦ ជាបណ្តោះអាសន្ន ចាប់ពីព្រលានយន្តហោះរហូតដល់សុខាសៀមរាប និងកន្លែងមួយចំនួនទៀតក្នុងអំឡុងពេលការធ្វើដំណើរ និងការស្នាក់នៅរបស់ប្រតិភូ ដូចមានក្នុងផែនទី និងមានការបញ្ជាការចរាចររបស់សមត្ថកិច្ចតាមគោលដៅនីមួយៗ។

សូមបញ្ជាក់បន្ថែមជូនថាការបិទចរាចរទូទៅនេះ គឺធ្វើឡើងតែក្នុងពេលការធ្វើដំណើររបស់ប្រតិភូតែប៉ុណ្ណោះ បន្ទាប់ពីប្រតិភូឆ្លងកាត់រួច ចរាចរនឹងបើកដំណើរការធម្មតា លើកលែងតែគោលដៅទីតាំងប្រជុំ ឬការស្នាក់នៅតាមការចាំបាច់របស់សមត្ថកិច្ចជាក់ស្តែង។ អាស្រ័យហេតុនេះសូមបងប្អូនប្រជាពលរដ្ឋ និងសាធារណជនមេត្តាជ្រាប និងបញ្ចៀសចរាចរណ៍តាមការណែនាំរបស់សមត្ថកិច្ចជៀសវាងការកកស្ទះចរាចរណ៍ ៕

ប្រភព៖ រដ្ឋបាលខេត្តសៀមរាប/Siem Reap Provincial Administration