សម្តេចតេជោ ហ៊ុន សែន លើកឡើងថា កម្ពុជាមិនបានដំឡើងថ្លៃអគ្គិសនីនោះទេ ខណៈប្រទេសជិតខាងបានឡើងថ្លៃអគ្គិសនី
ខេត្តពោធិ៍សាត់៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី១៤ ខែមីនា ឆ្នាំ២០២៣ បានឱ្យដឹងថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា កម្ពុជាមិនដំឡើងថ្លៃអគ្គិសនីនោះទេ ខណៈប្រទេសជិតខាងចាប់ផ្ដើមឡើងថ្លៃអគ្គិសនីគ្រប់គ្នា។ ការលើកឡើងរបស់សម្តេចតេជោនាយករដ្ឋមន្រ្ដីនេះ ក្នុងពិធីជួបសំណេះសំណាលជាមួយប្រជាពល រដ្ឋដែលបានផ្លាស់ប្តូរទីលំនៅទៅទីតាំងថ្មី និងត្រួតពិនិត្យការដ្ឋានសាងសង់វារីអគ្គិសនីស្ទឹងពោធិ៍សាត់១ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ នាព្រឹកថ្ងៃទី១៤ ខែមីនា ឆ្នាំ២០២៣។
សម្ដេចតេជោ ហ៊ុន សែន បានថ្លែងថា កាលពីមុនអគ្គិសនីរបស់ប្រទេសជិតខាងមានតម្លៃថោកជាងកម្ពុជា ហើយបច្ចុប្បន្ន អគ្គិសនីរបស់ប្រទេសជិតខាងឡើងថ្លៃគ្រប់គ្នា តែកម្ពុជាអត់ឡើងថ្លៃអគ្គិសនីនោះទេ។ សម្ដេចតេជោបានថ្លែងបញ្ជាក់ថា៖ «ពីមុនប្រទេសជិតខាងរបស់យើង អគ្គិសនីថោកជាងយើង ប៉ុន្តែឥឡូវប្រទេសជិតខាងរបស់យើង ចាប់ផ្ដើមឡើងថ្លៃសលើសពីយើងហើយ តែយើងឱ្យទ្រាំដើម្បីជួយដល់ប្រជាពលរដ្ឋ»។ សម្តេចតេជោនាយករដ្ឋមន្រ្ដីបានបន្ដថា សម្រាប់ក្នុងវិស័យកសិកម្ម ក្នុងការបូមទឹកគឺគិតតម្លៃតែ ៤៨០រៀល ប៉ុណ្ណោះ ក្នុង ១ គីឡូវ៉ាត់ម៉ោង ប៉ុន្តែត្រូវដឹងម៉ោងដែលត្រូវបូមផងដែរ។
សម្តេចតេជោ ហ៊ុន សែន បានបញ្ជាក់ឱ្យដឹងថា រាជរដ្ឋាភិបាលត្រូវបញ្ចេញថវិកាក្នុងមួយខែ ប្រមាណពី៤០លានដុល្លារ ទៅ ៥០ លានដុល្លារ ដើម្បីជួយដោះ ស្រាយដល់ប្រជាពលរដ្ឋដែលរងគ្រោះ ងាយរងគ្រោះដោយសារកូវីដ១៩ និងស្រ្ដីក្រីក្រដែលមានផ្ទៃពោះ។សម្ដេចតេជោនាយករដ្ឋមន្រ្ដីបានបញ្ជាក់ឱ្យដឹងទៀតថា បច្ចុប្បន្ននេះសម្តេចក៏បានសម្រេចបន្ថែមថវិកាលើកម្មវិធីកំពុងតែអនុវត្ដន៍ជាក់ស្ដែង ដោយឧបត្ថម្ភថវិកាដល់ស្រ្ដីក្រីក្រ ស្រ្ដីមានផ្ទៃពោះ ដែលកំពុងតែទទួលផលពីកម្មវិធីគាំពារសង្គម ចាប់ពីមានផ្ទៃពោះ ពេលសម្រាលកូន និងរហូតដល់កូនមានអាយុ២ឆ្នាំបន្ថែមទៀត ។
សម្ដេចតេជោបានបន្ថែមថា៖ «អីចឹង ផលប្រយោជន៍ដែលប្រជាពលរដ្ឋកំពុងបានទទួលជាមួយបណ្ណក្រីក្រ ជាមួយអត្ថប្រយោជន៍ផ្សេងៗ អ្នកទទួលផលដែលប៉ះពាល់ដោយសារកូវីដ ដោយក្នុងមួយខែ រាជរដ្ឋាភិបាលបញ្ចេញលុយក្នុងរង្វង់ពី ៤០លានដុល្លារ ទៅ ៥០លានដុល្លារ សម្រាប់ដោះស្រាយឱ្យប្រជាពលរដ្ឋរបស់យើង។ កម្មវិធីកំពុងតែអនុវត្ដន៍ជាក់ស្ដែងទៅលើស្រ្ដីក្រីក្រ ដែលកំពុងទទួលផលពីកម្មវិធីគាំពារសង្គមសម្រាប់ស្រ្ដីក្រីក្រ កំពុងមានផ្ទៃពោះ ដោយកំពុងតែឱ្យគេពិនិត្យផ្ដល់លុយបន្ថែមដល់ស្រ្ដីចាប់ពីមានផ្ទៃពោះ ពេលកូនកើត រហូតដល់កូនមានអាយុពីរឆ្នាំ»៕
ប្រភព៖ ក្រសួងព័ត៌មាន