យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា រដ្ឋបាលខេត្តសៀមរាប សហការជាមួយស្នងការដ្ឋានគរបាលខេត្ត រដ្ឋបាលក្រុង និង ក្រុមការងារសាកលវិទ្យាល័យ Weseda នៃប្រទេសជប៉ុន នៅព្រឹកថ្ងៃទី១៧ ខែមីនា ឆ្នាំ២០២៣នេះ បានធ្វើការហ្វឹកហាត់ប្រើប្រាស់ម៉ាស៊ីនបូមទឹកចល័តសម្រាប់មុខងារពន្លត់ អគ្គិភ័យដែលមានទីតាំងនៅបរិវេណតំបន់ផាប់ស្ទី្រត និងផ្សារចាស់ ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប ក្នុងគោលបំណងហ្វឹកហាត់ ដល់ជនបង្គោល ជាមន្រ្តីនៃស្ថាប័នពាក់ព័ន្ធ និងអាជីវករ ប្រជាពលរដ្ឋក្នុងតំបន់ផាប់ស្រ្ទីត និងផ្សារចាស់ ដើម្បីមានសមត្ថភាពអាចចូលរួមជួយពន្លត់អគ្គិភ័យករណីកើតឡើង ជាយថាហេតុ។

លោក កុសល មករាពិសិទ្ធ នាយកទីចាក់ការទំនាក់ទំនងសាធារណៈ និងសហ ប្រតិបត្តិការអន្តរជាតិ នៃរដ្ឋបាលខេត្តសៀមរាប បានឱ្យដឹងថា តាមរយៈគម្រោងការពារ អគ្គិភ័យនៅតំបន់ផ្សារចាស់ និងផាប់ស្រ្ទីត ក្រុងសៀមរាប សាកលវិទ្យាល័យ Weseda នៃប្រទេសជប៉ុន បានផ្តល់ម៉ាស៊ីនបូមទឹកចល័តសម្រាប់មុខងារពន្លត់អគ្គិភ័យចំនួន២គ្រឿង ដាក់ប្រចាំនៅតំបន់នេះ។

លោកបន្តថា តំបន់ផ្សារចាស់ និងផាប់ស្រ្ទីត គឺជាតំបន់ប្រមូលផ្តុំភ្ញៀវទេសចរនៅ ពេលយប់ដ៏សំខាន់របស់ខេត្តសៀមរាប ជាពិសេសនៅពេលមានកម្មវិធីបុណ្យជាតិធំៗ ដូចជានៅក្នុងព្រឹត្តិការណ៍អង្គរសង្ក្រាន្តខាងមុខនេះ ភ្ញៀវទេសចរនឹងសម្រុកមក កម្សាន្តនៅ ទីនេះច្រើន ដូចនេះការបង្ការអគ្គិភ័យជាកត្តាមួយដ៏សំខាន់ផងដែរ។

លោកឧត្តមសេនីយ៍ត្រី ឌុត ខុន ស្នងការរងនគរបាលខេត្តសៀមរាប បានឱ្យដឹងថា ម៉ាស៊ីនបូមទឹកចល័តសម្រាប់មុខងារពន្លត់អគ្គិភ័យនេះ គឺមានសារៈសំខាន់ណាស់សម្រាប់ ចូលរួមបង្ការអគ្គិភ័យនៅក្នុងតំបន់នេះ។ លោកថា ម៉ាស៊ីនបូមទឹកចល័តនេះ យើងដាក់នៅពីរ គោលដៅគឺ នៅផ្នែកខាងកើតផ្សារចាស់ និងផាប់ស្រ្ទីត ចំនួន០១គ្រឿង និងនៅខាងលិច ចំនួន០១គ្រឿង ដោយម៉ាស៊ីនមួយមានទីយោទឹកចំនួន៣០០ម៉ែត្រ និងបូមទឹកចេញពី ស្ទឹងសៀមរាបផ្ទាល់ ហើយអ្នកប្រើប្រាស់ម៉ាស៊ីននេះ គឺជាសន្តិសុខ និងអាជីវករនៅទីនេះ ផ្ទាល់តែម្តង ដោយពួកគាត់ត្រូវបែងចែកជាក្រុមៗ សម្រាប់ប្រតិបត្តិការករណីមាន អគ្គិភ័យកើតឡើងជាយថាហេតុ។

ពួកគាត់អាចប្រតិបត្តិការពន្លត់អគ្គិភ័យបានមុន ពេលរថយន្តពន្លត់អគ្គិភ័យរបស់ ស្នងការនគរបាលមកដល់។ ដូចនេះ ដើម្បីឱ្យសន្តិសុខ និងជាអាជីវករនៅតំបន់នេះចេះ ប្រើប្រាស់ម៉ាស៊ីន និងចេះបាញ់ទឹកឱ្យបានត្រឹមត្រូវតាមបច្ចេកទេស រដ្ឋបាលខេត្តសៀមរាប សហការជាមួយស្នងការដ្ឋានគរបាលខេត្ត រដ្ឋបាលក្រុង និងក្រុមការងារសាកលវិទ្យាល័យ Weseda នៃប្រទេសជប៉ុន បានធ្វើការហ្វឹកហាត់ជាក់ស្តែងដល់ពួកគាត់នៅថ្ងៃនេះ។

លោកស្នងការរងបានបញ្ជាក់ថា បើតាមការហាត់សមជាក់ស្តែងឃើញថា ករណីមាន អគ្គិភ័យកើតឡើងជាយថាហេតុក្នុងកម្រិតតូចនៅតំបន់នេះ ម៉ាស៊ីនបូមទឹកចល័តចំនួន ២គ្រឿងនេះ អាចមានសមត្ថភាពគ្រប់គ្រងស្ថានការបាន៕

ប្រភព៖ ក្រសួងព័ត៌មាន