ខេត្តបន្ទាយមានជ័យ៖ នៅថ្ងៃទី២៣ ខែមីនា ឆ្នាំ២០២៣ យោងតាមការចុះផ្សាយរបស់ ក្រសួងព័ត៌មាន បាន​​​​​​​​​​​ឱ្យដឹងថា ប្រធានមន្ទីរទេសចរណ៍ខេត្តបន្ទាយមាន ជ័យ លោក ឈឿន សេរីវុធ បានប្រាប់ឱ្យដឹងនៅរសៀលថ្ងៃពុធ ១កើត ខែចេត្រ ឆ្នាំខាល ចត្វា ស័ក ព.ស. ២៥៦៦ ត្រូវនឹងថ្ងៃទី២២ ខែមីនា ឆ្នាំ២០២៣ថា ចំនួនភ្ញៀវបរទេស ចូលតាមច្រក ទ្វារអន្តរជាតិប៉ោយប៉ែត មានការកើនឡើងជាលំដាប់ ដោយចូលក្នុង១ថ្ងៃមិនតិចជាង ១ពាន់ នាក់នោះទេ។

យោងតាមរបាយការណ៍លោក ឈឿន សេរីវុធ បានបង្ហាញឱ្យដឹងថា សម្រាប់ខែកុម្ភៈ ឆ្នាំ២០២៣នេះ មានភ្ញៀវបរទេសចូលតាមច្រកទ្វារអន្តរជាតិប៉ោយប៉ែត ចំនួន ១១៩.០០០នាក់ ពោលមានការកើនឡើង ៣,៥៩ភាគរយ បើប្រៀបធៀបខែមករា ឆ្នាំ២០២៣ មានចំនួន ១១៥ ២២១នាក់។

លោកប្រធានមន្ទីរទេសចរណ៍ខេត្តបន្ទាយមានជ័យរូបនេះ បានឱ្យដឹងទៀតថា ភ្ញៀវ បរទេស ដែលចូលតាមច្រកទ្វារអន្តរជាតិប៉ោយប៉ែតមកកម្ពុជា រួមមាន៖ ជនជាតិថៃចំនួនជាង ១០៩ ០០០នាក់, ឥណ្ឌូណេស៊ី ២ ៧៤៧នាក់, រុស្ស៊ី ២ ៥០០នាក់, អង់គ្លេស ៩៧៧ នាក់, អាល្លឺ ម៉ង់ ៨៥០នាក់, អាម៉េរិក ៧២០នាក់, បារាំង ៧២០នាក់, ចិន ៦៥៩នាក់, ម៉ាឡេស៊ី ៥៥៨នាក់ និង ជនជាតិជប៉ុនចំនួន ៣២៩នាក់។

លោកឈឿន សេរីវុធ បានបញ្ជាក់ថា ជាមួយគ្នានេះដើម្បីធ្វើឱ្យកាន់តែប្រសើរ ក្នុងការ ទាក់ទាញភ្ញៀវបរទេសនោះ កម្លាំងនគរបាលច្រកទ្វារព្រំដែនអន្តរជាតិប៉ោយប៉ែត រួមជាមួយ មន្ត្រីរាជការបងប្អូនប្រជាពលរដ្ឋ និងក្រុមហ៊ុនកាស៊ីណូ ត្រូពិកាណា ក៏បានធ្វើការសម្អាតអនា ម័យ-បរិស្ថានជុំវិញបរិវេណរង្វង់មូល រហូតដល់គោលដៅអគារថ្មី ដើម្បីកែលម្អសោភ័ណភាព ជូនអ្នកដំណើរ ដែលឆ្លងកាត់ចេញ-ចូលប្រទេសកម្ពុជា-ថៃ ក្រោយពីអាជ្ញាធរក្រុងប៉ោយប៉ែត ខេត្តបន្ទាយមានជ័យ បានសម្រេចបើកឱ្យដំណើរការផ្លូវនេះឡើងវិញ បន្ទាប់ពីបានបិទក្រោយ ពីមានការឆេះអគារកាស៊ីណូ កាលពីពេលកន្លងទៅនេះ។

អភិបាលក្រុងប៉ោយប៉ែតលោក គាត ហ៊ុល បានប្រាប់ឱ្យដឹងដែរថា រដ្ឋបាលក្រុងបាន និងកំពុងបន្តយុទ្ធនាការកែលម្អសោភ័ណភាព តាមដងផ្លូវជាតិលេខ៥ ក្នុងក្រុងឱ្យកាន់តែល្អ ប្រសើរថែមទៀត ។ លោកក៏បានធ្វើការអំពាវនាវ សុំឱ្យមានកិច្ចសហការចូលរួមអនុវត្តន៍ទាំង អស់គ្នា ពីគ្រប់កម្លាំងមានសមត្ថកិច្ចពាក់ព័ន្ធ ដៃគូវិនិយោគ ក្រុមហ៊ុន និងបងប្អូនប្រជាពលរដ្ឋ ទូទាំងក្រុងដើម្បីកែលម្អសោភ័ណភាពទីក្រុងប៉ោយប៉ែត ឱ្យមានភាពស្រស់ស្អាតឱ្យស័ក្តិសម ជាតំបន់ឆ្លងកាត់ដំណើរចេញ-ចូល នៃភ្ញៀវទេសចរបរទេស និងភ្ញៀវទេសចរជាតិ កាន់តែមាន ចំនួនច្រើនឡើងថែមទៀត៕

ប្រភព៖ ក្រសួងព័ត៌មាន