ខេត្តបាត់ដំបង៖ កោតសរសើរណាស់ វិទ្យាល័យហ៊ុនសែនភ្នំសំពៅ ស្រុកបាណន់ ខេត្តបាត់ដំបង បានប្ដូរមកលក់នំធម្មជាតិ ឬនំខ្មែរឈប់លក់នំកញ្ចប់នាំចូលក្នុងសាលាហើយ ដើម្បីសុខភាពរបស់ក្មេងៗនៅក្នុងសាលា នេះបើយោងតាមគណីហ្វេសប៊ុកមួយឈ្មោះ ឌុច សារ៉ម បានបង្ហោះរូបភាព​ជាច្រើនសន្លឹក និងមានការចែករំលែកជាច្រើនផងដែរ ក្នុងបណ្ដាញសង្គម។

នៅក្នុងគណនីហ្វេសប៊ុកខាងលើ បានសរសេររៀបរាប់យ៉ាងដូច្នេះថា៖ « វិទ្យាល័យហ៊ុនសែនភ្នំសំពៅខ្ញុំឈប់លក់ចំណីខូចសុខភាពសម្រាប់ក្មេងហើយគឺងាកមកលក់នំខ្មែរសុទ្ធសាធវិញ។ ចុះសាលាខាងអ្នក??? #អរគុណក្រសួងដែលយកចិត្តទុកដាក់លើអាហារក្មេង ខ្ញុំជឿជាក់ថាលោក-លោកស្រីនឹងទទួលបានសុខភាពល្អមិនខានព្រោះលោកបានគិតគូរដល់សុខភាពរួម។ ឥទ្ធិលពលនៃការគិតគូរដល់ជនរួមជាតិនេះ បានជះឥទ្ធិពលយ៉ាងខ្លាំងខ្លាចំពោះលោក-លោកស្រីយ៉ាងពិតប្រាកដ។ »

គួរបញ្ជាក់ផងដែរថា យោងតាមអនុក្រឹត្យរបស់ រាជរដ្ឋាភិបាលកម្ពុជា កាលពីថ្ងៃទី១៤ ខែមីនា ឆ្នាំ២០២៣ បានចេញអនុក្រឹត្យ ស្ដីពីការអនុវត្តកម្មវិធីផ្តល់អាហារតាមសាលារៀនដោយប្រើប្រាស់ កសិផលក្នុងសហគមន៍ ក្នុងក្របខណ្ឌគោលនយោបាយជាតិគាំពារសង្គម ដែលហៅកាត់ថា «កម្មវិធី»។

ក្នុងមាត្រាទី៣៖ កសិផលក្នុងសហគមន៍ សំដៅដល់ផលិតផលក្នុងសហគមន៍ មានដូចជា អង្ករ ត្រី សាច់ ស៊ុត ទឹកដោះសត្វ បន្លែ ផ្លែឈើ គ្រាប់ធញ្ញជាតិ ចំណីអាហារដែលបញ្ចូលមីក្រូសារជាតិជាដើម ដែលមាន ប្រភពពីផលិតកម្មដំបូង សម្រាប់ផ្គត់ផ្គង់នៅតាមសាលារៀនសាធារណៈ ៕

ប្រភព៖ ឌុច សារ៉ម