ឃាត់ខ្លួនជនជាតិចិនចំនួន ៣នាក់ ពាក់ព័ន្ធនឹងបទល្មើស បំបែកកញ្ចក់រថយន្តលួចយកលុយ និងសម្ភារមានតម្លៃពីប្រជាពលរដ្ឋ នៅខេត្តព្រះសីហនុ

ខេត្តព្រះសីហនុ៖ នៅថ្ងៃទី០៥ ខែមេសា ឆ្នាំ២០២៣ លោកឧត្តមសេនីយ៌ទោ ជួន ណារិន្ទ ស្នងការនគរបាលខេត្តព្រះសីហនុ បានឱ្យដឹងថា នគរបាលឃាត់ខ្លួនជនសង្ស័យជាជនជាតិចិនចំនួន៣នាក់ ពាក់ព័ន្ធនឹងបទល្មើស វាយកញ្ចក់រថយន្តលួចយកលុយ និងសម្ភារមានតម្លៃ ពីប្រជាពលរដ្ឋ និងលួចដោះយកផ្លាកលេខរថយន្ត។

ហេតុការណ៍នេះ បានឱ្យដឹងថា នៅថ្ងៃត្រង់ថ្ងៃទី០៣ ខែមេសា ឆ្នាំ២០២៣ នៅចំណុចតំបន់សេដ្ឋកិច្ចពិសេស កំពង់ផែក្រុងព្រះសីហនុ សង្កាត់៣ ក្រុង-ខេត្តព្រះសីហនុ ក្រុមជនសង្ស័យបានវាយកញ្ចក់រថយន្តលួចយកលុយ និងសម្ភារមានតម្លៃ ពីរថយន្តរបស់ប្រជាពលរដ្ឋ ដែលចតទុកនៅទីនោះ រួចលួចយកកាបូបលុយរបស់ប្រជាពលរដ្ឋដែលដាក់នៅក្នុងរថយន្ត ក្នុងកាបូបនោះមាន៖

-លុយខ្មែរចំនួន ២០,០០០,០០០៛ (ម្ភៃលានរៀល)
-លុយប្រទេសអាស៊ានចំរុះគ្រប់ប្រភេទមួយចំនួនរួមឯកសារ ព្រមទាំងសម្ភារមួយចំនួនទៀត។

បន្ទាប់ពីទទួលបានបណ្តឹងរបស់ជនរងគ្រោះ លោកឧត្តមសេនីយ៌ទោស្នងការ បានបញ្ជាកម្លាំងនគរបាលធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី០៤ ខែមេសា ឆ្នាំ២០២៣ វេលាម៉ោង ០៨ និង ៣០នាទីព្រឹក ធ្វើការបង្ក្រាបបានទាំងស្រុង ដោយចាប់ឃាត់ខ្លួនបានជនសង្ស័យចំនួន ០៣នាក់ ភេទប្រុស ជាជនជាតិចិន នៅចំណុច ភូមិ២ សង្កាត់៤ ក្រុង-ខេត្តព្រះសីហនុ។

ជនសង្ស័យទាំង ០៣នាក់ មានឈ្មោះដូចខាងក្រោម៖
១-ឈ្មោះ SHEN AO ភេទប្រុស ជនជាតិចិន កើតនៅថ្ងៃទី ០៦-០៦-១៩៨០ មុខរបរ មិនពិតប្រាកដ ស្នាក់នៅ ភូមិ២ សង្កាត់៤ ក្រុង-ខេត្តព្រះសីហនុ ។
២-ឈ្មោះ JIN CHANGGE ភេទប្រុស ជនជាតិចិន កើតនៅថ្ងៃទី ០១-០១-១៩៦៧ មុខរបរ មិនពិតប្រាកដ ស្នាក់នៅ ភូមិ២ សង្កាត់៤ ក្រុង-ខេត្តព្រះសីហនុ ។
៣-ឈ្មោះ LI HONGYUAN ភេទប្រុស ជនជាតិចិន កើតនៅថ្ងៃទី ១០-០៦-១៩៦៧ មុខរបរ មិនពិតប្រាកដ ស្នាក់នៅ ភូមិ២ សង្កាត់៤ ក្រុង-ខេត្តព្រះសីហនុ ។

វត្ថុតាងចាប់យកបាន៖
-លុយខ្មែរចំនួន ២០,០០០,០០០៛ “ម្ភៃលានរៀល” (ផលនៃអំពើចោរកម្ម)
-លុយប្រទេសអាស៊ានចំរុះគ្រប់ប្រភេទមួយចំនួន (ផលនៃអំពើចោរកម្ម)
-ផ្លាកលេខរថយន្ត ០២គូ (ផលនៃអំពើចោរកម្ម)៖
១-បាត់ដំបង 2D-9008
២-កែប 2B-2122 ។

-រថយន្ត ០១គ្រឿង ម៉ាក TOYOTA CAMRY ស៊េរីឆ្នាំ២០០៧ ពណ៌ស ផ្លាកលេខៈ ភ្នំពេញ 2BH-1287 (មធ្យោបាយ) រួមនឹងសម្ភារ វត្ថុតាងមួយចំនួនទៀត។

បន្ទាប់ពីធ្វើការសាកសួរ ជនសង្ស័យបានសារភាពថា ពួកគេធ្លាប់ធ្វើសកម្មភាពវាយកញ្ចក់រថយន្ត លួចយកកាបូបលុយសម្ភារនិងលួចដោះយកផ្លាកលេខរថយន្ត សរុបចំនួន ០៥លើក ក្នុងនោះមាន៖

វាយកញ្ចក់រថយន្ត លួចយកកាបូបលុយ និងសម្ភារចំនួន ០៣លើក៖

-លើកទី១ នៅថ្ងៃទី១៩ ខែមីនា ឆ្នាំ២០២៣ នៅចំណុចផ្លូវឆ្នេរឯករាជ្យ ស្ថិតនៅ ភូមិ១ សង្កាត់៣ ក្រុង-ខេត្តព្រះសីហនុ ។

-លើកទី២ នៅថ្ងៃទី០២ ខែមេសា ឆ្នាំ២០២៣ នៅចំណុចឆ្នេរអូរត្រេះ ស្ថិតនៅ ភូមិ៦ សង្កាត់៤ ក្រុង-ខេត្តព្រះសីហនុ ។

-លើកទី៣ នៅថ្ងៃទី០៣ ខែមេសា ឆ្នាំ២០២៣ នៅចំណុចមុខតំបន់សេដ្ឋកិច្ចពិសេសកំពង់ផែ ស្ថិតនៅ ភូមិ៣ សង្កាត់៣ ក្រុង-ខេត្តព្រះសីហនុ ។

លួចដោះយកផ្លាកលេខរថយន្តចំនួន ០២លើក៖
-លើកទី១ នៅថ្ងៃទី២៤ ខែមីនា ឆ្នាំ២០២៣ លួចយកផ្លាកលេខរថយន្តមួយគូ (កែប 2B-2122) នៅចំណុចក្រុមទី៨ ភូមិ២ សង្កាត់៤ ក្រុង-ខេត្តព្រះសីហនុ ។

-លើកទី២ នៅអំឡុងចុងខែមីនា ឆ្នាំ២០២៣ លួចយកផ្លាកលេខរថយន្តមួយគូ (បាត់ដំបង 2D-9008) នៅខេត្តបាត់ដំបង ។

ជនសង្ស័យខាងលើ ការិយាល័យនគរបាលព្រហ្មទណ្ឌកម្រិតស្រាល កសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីផ្តន្ទាទោសតាមផ្លូវច្បាប់ ៕

ប្រភព៖ លោក Huy Bunleng News