ក្រសួងសុខាភិបាល បានសម្រេចបិទមជ្ឈមណ្ឌលថែរក្សាសម្ផស្ស “S88 BEAUTY” ចំនួន១១ទីតាំងនៅទូទាំងប្រទេស ហើយបន្តស្វែងរកទីតាំងដទៃទៀត

(ភ្នំពេញ)៖ ក្រសួងសុខាភិបាល បានសម្រេចបិទមជ្ឈមណ្ឌលថែរក្សាសម្ផស្ស S88​ BEAUTY ចំនួន១១ទីតាំងនៅទូទាំងប្រទេស ហើយបន្តស្វែងរកទីតាំងដទៃទៀត ដើម្បីបិទចោល។ វិធានការនេះ បានធ្វើឡើងបន្ទាប់ពីមជ្ឈមណ្ឌលថែរក្សាសម្ផស្ស បានបង្កបញ្ហាដល់ភរិយាលោក ពែកមី ដែលស្វែងរកសេវាថែរក្សាសម្ផស្សនៅមជ្ឈមណ្ឌលនេះ។ នេះបើយោងតាមការចុះផ្សាយព័ត៌មានពី Freshnews។

កាលពីយប់ថ្ងៃទី៥ ខែសីហា ក្រសួងសុខាភិបាល បានឱ្យដឹងថា កន្លងមកក្រសួង បានចេញសេចក្តី​សម្រេចឱ្យមជ្ឈមណ្ឌលនេះ បើកអាជីវកម្មតែមួយទីតាំង ស្ថិតនៅផ្ទះលេខ A៣៧ ផ្លូវជាតិលេខ៤ ភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។ ប៉ុន្តែម្ចាស់មជ្ឈមណ្ឌល មិនបានគោរពត្រឹមត្រូវតាម​លក្ខខណ្ឌបច្ចេកទេស ហើយរំលោភលើសេចក្តីសម្រេចរបស់ក្រសួង ដោយបានលួចបើកសាខាមជ្ឈមណ្ឌលថែរក្សាសម្ផស្សជាច្រើនកន្លែងផ្សេងទៀត ដោយគ្មានការអនុញ្ញាតពីក្រសួង។
ទន្ទឹមនឹងការបិទទីតាំងទាំង១១ ដែលបានរកឃើញហើយនោះ ក្រសួងសុខាភិបាល កំពុងស្វែងរកទីតាំងដទៃទៀត ដើម្បីឈានទៅចាត់វិធានការ ហើយក៏នឹងរៀបចំសំណុំរឿងបញ្ជូនទៅតុលាការ ដើម្បីចាត់វិធានការតាមច្បាប់ផងដែរ។
សូមបញ្ជាក់ថា ចំណាត់ការរបស់ក្រសួងសុខាភិបាល​លើមជ្ឈមណ្ឌលថែរក្សាសម្ផស្ស S88 BEAUTY បន្ទាប់ពីមជ្ឈមណ្ឌលនេះ បង្កឱ្យមានបញ្ហាសុខភាពដល់ភរិយារបស់តារាកំប្លែងនាយពែកមី ដែលទៅស្វែងរកសេវាថែរក្សាសម្ផស្ស ដោយព្យួរសេរ៉ូមឱ្យស្បែកស។
ក្រោយព្យួរសេរ៉ូមហើយ ធ្វើឱ្យភរិយារបស់លោក ពែកមី ថប់ដង្ហើម រហូតបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត៕