Galaxy S10 Plus ឡូយយ៉ាងហ្នឹង ដឹងអត់ថា ថ្លៃដើមផលិតស្មាតហ្វូនមួយនេះ ចំណាយអស់ប៉ុន្មានក្នុងមួយគ្រឿង?

ប៉ុន្មានរយៈមុនយើងបានដឹងច្បាស់រួចមកហើយ អំពីតម្លៃស្មាតហ្វូនចុងក្រោយរបស់ Samsung គឺ Galaxy S10 Plus ដែលក្នុងនោះ ប្រភេទទំហំផ្ទុក 128GB មានតម្លៃ $999.99 និងទំហំផ្ទុក 1TB មានតម្លៃ $1,599 ។ យ៉ាងណាមិញការប៉ាន់ស្មានថ្មីដែលបានចេញផ្សាយដោយ TechInsights ក៏បានបង្ហាញពីតម្លៃសមាសភាគជាក់ស្តែងនៃស្មាតហ្វូនថ្មីបំផុតរបស់ Galaxy S10 Plus នេះ។

តាមការបង្ហាញពីតម្លៃសមាសភាគជាក់ស្តែងបានឱ្យដឹងថា Galaxy S10 Plus ទំហំផ្ទុក 128GB គឺមានតម្លៃសរុបប្រមាណ $420 ដែលវាថ្លៃជាងមុន $40 ធៀបនឹងម៉ូដែល Galaxy S9+ (64GB) កាលពីឆ្នាំមុន។ ធាតុផ្សំដែលមានតំលៃថ្លៃជាងគេបំផុតគឺអេក្រង់ AMOLED Infinity-O ថ្មីទំហំ 6.4អ៊ីង ជាមួយនឹងតម្លៃ $86.50 ក្នុងមួយបន្ទះ។ ចំណែកដំណើរការ (Exynos 9820) និងម៉ូឌឹមរបស់វា គឺមានតម្លៃ $70.50 ដែលថ្លៃផលិតរបស់វាសម្រាប់លើកនេះគឺថោកជាង Exynos 9810 ក្នុង Galaxy S9+ ប្រហែល $9។

ចំណែកការដំឡើងកាមេរ៉ា ៣គ្រាប់ ថ្មីរបស់ Galaxy S10 Plus មានតម្លៃ $56.50 និង RAM មានតម្លៃប្រហែល $50.50។ ចុងក្រោយគឺ ការធ្វើតេស្ត ការតំឡើង និងកញ្ចប់បន្ថែម មានតម្លៃ $34.50 ដែលក្នុងនោះ SD Card ទំហំ 128GB នឹងត្រូវបានរួមបញ្ចូលបន្ថែមនៅក្នុងប្រអប់ផ្ទាល់ និងមានតម្លៃ $12 ។ បន្ថែមលើតម្លៃសមាសភាគស្មាតហ្វូន ការដឹកជញ្ជូន និងសូម្បីតែតម្លៃ R&D ទាំងអស់គឺត្រូវចំណាយប្រាក់ទាំងអស់៕

អត្ថបទ៖ លីដា
ប្រភព៖ phonearena