ក្រសួងអប់រំ សហការជាមួយស្ថាប័ន និងដៃគូពាក់ព័ន្ធ នឹងរៀបចំពិព័រណ៍សៀវភៅ មានរយៈពេល ៣ថ្ងៃ ដើម្បីចូលរួមអបអរសាទរទិវាជាតិអំណានលើកទី៩
(ភ្នំពេញ)៖ ក្រសួងអប់រំ យុវជន និងកីឡា សហការជាមួយស្ថាប័ន និងដៃគូពាក់ព័ន្ធ នឹងរៀបចំពិព័រណ៍សៀវភៅ ដែលមានរយៈពេល៣ថ្ងៃ ដើម្បីចូលរួមអបអរសាទរទិវាជាតិអំណានលើកទី៩ ក្រោមប្រធានបទ៖ « អំណានជាមូលដ្ឋានគ្រឹះ សម្រាប់ទាំងអស់គ្នាក្នុងជីវិត »។
យោងតាមសេចក្តីជូនដំណឹងរបស់ក្រសួងអប់រំ បានឱ្យដឹងថា ពិព័រណ៍សៀវភៅ នឹងប្រព្រឹត្តទៅចំនួន៣ថ្ងៃ (ចាប់ពីថ្ងៃទី ០៩-១០-១១ ខែមីនា ឆ្នាំ២០២៤ នៅវេលាម៉ោង ៨ព្រឹក ដល់ម៉ោង ៧យប់ នៅ វិទ្យាស្ថានបច្ចេកវិទ្យាកម្ពុជា) ។
ក្រសួងអប់រំ បញ្ជាក់ថា៖ «សូមចូលរួមឱ្យបានកុះករ ដើម្បីជាចំណែកក្នុងការលើកស្ទួយដល់ការអាន និងតែងនិពន្ធសៀវភៅនៅកម្ពុជា និងដើម្បីចូលរួមលើកទឹកចិត្តដល់បេក្ខជន ដែលមកពីទូទាំងប្រទេសក្នុងការប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រ»។
ពិព័រណ៍សៀវភៅ នេះសហការរៀបចំដោយក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងសហការរៀបចំដោយដៃគូឧបត្ថម្ភជាច្រើន៕
ប្រភព៖ ក្រសួងព័ត៌មាន