ប៉ាពួញូហ្គីណេ៖ ហេតុការណ៍បាក់ដីនៅក្នុងប្រទេសប៉ាពួញូហ្គីណេដែលបានផ្តើមកើតឡើងតាំងតែពីចុងសប្តាហ៍មុននៅមិនទាន់បិទបញ្ចប់នៅឡើយទេ ហើយតួលេខជាក់ស្តែងរបស់ក្រុមជនរងគ្រោះក៏នៅមិនទាន់កំណត់ឱ្យបានច្បាស់លាស់នៅឡើយដែរ នេះបើយោងតាមសេចក្តីរាយការណ៍របស់បណ្តាញសារព័ត៌មាន The Strait Time នៅព្រឹកថ្ងៃអង្គារ ទី២៨ ខែឧសភានេះ។ មូលហេតុដែលគេមិនទាន់អាចកំណត់ចំនួនជនរងគ្រោះបាននោះគឺដោយហេតុថា​ ដីដែលជាបំណែករបស់ភ្នំចេះតែបន្តបាក់មកនិងបន្តកប់ក្រុមពលរដ្ឋដែលកំពុងតែទៅជីកកកាយរកសាច់ញាតិរបស់ពួកគេបន្ថែមទៀតផងដែរ។

យ៉ាងណាក្តីសម្រាប់អាជ្ញាធរប៉ាពួញូហ្គីណេអាចឱ្យដឹងបានត្រឹមថា ពលរដ្ឋដែលបានកប់ក្រោមគំនរដីទាំងរស់នោះអាចមានចំនួនប្រហែលជា  ២,០០០នាក់ ហើយតួលេខអ្នកស្លាប់បាត់បង់ជីវិតវិញអាចមានចំនួនលើសពី ៦៧០នាក់  ខណៈចំនួនសាកសពជាក់ស្តែងទើបត្រូវគេឃើញមានចំនួន ៥នាក់ប៉ុណ្ណោះ។ សូមបញ្ជាក់ជូនថា ហេតុការណ៍អកុសលខាងលើនេះបានកើតឡើងនៅក្នុងតំបន់មួយស្ថិតនៅប៉ែកខាងជើងនៃប្រទេសប៉ាពួញូហ្គីណេនិងជាតំបន់នៅជិតព្រំដែនជាមួយប្រទេសអូស្រ្តាលី ហើយគិតត្រឹមពេលនេះនៅក្នុងតំបន់កើតហេតុនៅមានពលរដ្ឋចន្លោះពី ៤,៥០០-៨,០០០នាក់ទៀតដែលចាំបាច់ត្រូវធ្វើការជម្លៀសខ្លួនជាបន្ទាន់៕

អត្ថបទ៖ ភក្តី

ប្រភព៖ The Strait Time