ក្រុមហ៊ុន Apple បានលុបចោលនូវគម្រោងផលិតឧបករណ៍សាកថ្មឥតខ្សែ AirPower

យោងតាមគេហទំព័រ TechCrunch បានឱ្យដឹងថា ក្រុមហ៊ុន Apple បានលុបចោលនូវគម្រោងផលិតឧបករណ៍ឥតខ្សែ AirPower ដោយលើកឡើងពីការលំបាកក្នុងការសម្រេចបាននូវ «ស្តង់ដារខ្ពស់» សម្រាប់ផលិតផលមួយនេះ។ បើតាមសម្តីរបស់លោក Dan Riccio នៃក្រុមហ៊ុន Apple SVP បាននិយាយថា បន្ទាប់ពីមានការខិតខំប្រឹងប្រែងជាច្រើនយើងបានសន្និដ្ឋានថា AirPower នឹងមិនសម្រេចបាននូវបទដ្ឋានខ្ពស់ដែលយើងត្រូវការនោះទេ និងយើងបានលុបចោលគម្រោងនេះ ហើយយើងខ្ញុំសូមអភ័យទោសចំពោះអតិថិជនដែលកំពុងរង់ចាំផលិតផលនេះ។

ឧបករណ៍សាកថ្ម AirPower ត្រូវបានប្រកាសជាលើកដំបូងក្នុងអំឡុងព្រឹត្តិការណ៍ iPhone X របស់ក្រុមហ៊ុន កាលពីខែកញ្ញា ឆ្នាំ២០១៧ នៅពេលដែលក្រុមហ៊ុន Apple បានដាក់បញ្ចូលឧបករណ៍សាកឥតខ្សែ ទៅជា feature ថ្មីរបស់ iPhone X ។ កាលនោះក្រុមហ៊ុន Apple បាននិយាយថា ខ្លួននឹងចេញលក់នៅ ឆ្នាំ២០១៨ ប៉ុន្តែបន្ទាប់មកក៏បាត់សូន្យអស់រយៈពេល ១៨ខែ គ្មានដំណឹងអ្វីសោះ។ ក្រុមហ៊ុន Apple បានសន្យាថា នឹងមានបន្ថែម feature គួរឱ្យចាប់អារម្មណ៍មួយចំនួនរបស់ AirPower រួមទាំងសមត្ថភាពក្នុងការសាកឧបករណ៍រហូតដល់ទៅ ៣គ្រឿង ក្នុងពេលតែមួយ ជាពិសេសសាកថ្មឱ្យ នាឡិកា Apple, AirPod និងទូរស័ព្ទ iPhone ៕

អត្ថបទ៖ លីដា
ប្រភព៖ theverge