កូរ៉េខាងត្បូង៖ អាកាសយានដ្ឋានអន្តរជាតិ Incheon របស់ប្រទេសកូរ៉េខាងត្បូង ត្រូវបានបិទផ្លូវរត់រយៈពេលប្រហែល ៣ម៉ោង កាលពីថ្ងៃទី២៦ ខែមិថុនា ឆ្នាំ២០២៤ ម្សិលមិញនេះ ដោយសារតែការបង្ហោះបាឡុងសំរាមមកពីប្រទេសកូរ៉េខាងជើង នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី២៦ ខែមិថុនា។

អ្នកនាំពាក្យអាកាសយានដ្ឋានបានឱ្យដឹងថា មានបាឡុងចំនួន ៤បានបានធ្លាក់ទៅក្នុងបរិវេណនៃព្រលានយន្តហោះ ដោយក្នុងនោះមានបាឡុងចំនួន ៣ បានធ្លាក់នៅលើផ្លូវដែលយន្តហោះត្រូវចុះចត និងចេញដំណើរ ខណៈបាឡុងមួយផ្សេងទៀតបានធ្លាក់នៅចំច្រកចេញចូលរបស់អ្នកដំណើរ។ ហើយនេះក៏​មិន​មែន​ជា​លើក​ទី​មួយ​ទេ​ ដែល​ប្រតិបត្តិការ​នៅ​អាកាសយានដ្ឋាន​ដែល​មាន​ចម្ងាយ​ប្រហែល ៤០ គីឡូម៉ែត្រ​ពី​ព្រំដែន​កូរ៉េ​ខាង​ជើង ​ត្រូវ​បាន​រំខាន​ដោយ​បាឡុងទាំងនោះ​។

ទន្ទឹមនឹងនេះដែរ សាជីវកម្មអាកាសយានដ្ឋានអន្តរជាតិ Incheon បានឱ្យដឹងថា ការរំខានដល់ជើងហោះហើរក្នុងស្រុក និងអន្តរជាតិបានកើតឡើងនៅចន្លោះម៉ោង ១ និង ៤៦នាទីយប់រហូតដល់ម៉ោង ៤ និង ៤៤នាទីទាបភ្លឺ (ម៉ោងនៅក្នុងប្រទេសកូរ៉េ) ហើយផ្លូវរត់ក៏បានបើកឡើងវិញចាប់តាំងពីពេលនោះមក។

គួររម្លឹកជូនថា កូរ៉េខាងជើងបានផ្តើមបង្ហោះបាឡុងដែលនៅក្នុងនោះមានផ្ទុកសុទ្ធតែសំរាមចូលមកកាន់ប្រទេសកូរ៉េខាងត្បូងតាំងតែពីចុងខែឧសភាមកម្លេះ ហើយការបង្ហោះបាឡុងនេះគឺជាការឆ្លើយតបទៅនឹងកូរ៉េខាងត្បូងដែលនាពេលកន្លងមកបានបង្ហោះបាឡុងជាច្រើនមានផ្ទុកទៅដោយថ្នាំពេទ្យ អាហារ លុយ និងខិត្តប័ណ្ណ​ រិះគន់​មេដឹកនាំ​កូរ៉េខាងជើងចូលទៅក្នុងទឹកដីកូរ៉េខាងជើង ដើម្បីឱ្យពលរដ្ឋនៅក្នុងប្រទេសកូរ៉េខាងជើងអាចទទួលបានសម្ភារៈទាំងអស់នោះ៕

អត្ថបទ៖ ភក្តី
ប្រភព៖ The Strait Time