(ភ្នំពេញ)៖ Miss Grand Cambodia ខេត្ត រតនគីរី កញ្ញា ម៉ាច ដាវី ដែលទើបតែជាប់ជា Miss Grand Cambodia ឆ្នាំ២០២៤ លំដាប់រងទី៣ កាលពីថ្ងៃទី១៥ ខែកក្កដា ឆ្នាំ២០២៤ បានចេញលិខិតជូនដំណឹងទៅកាន់​លោក​ ញ៉ា​ រ៉ូម៉ាណូ​ ដែល​ជា​ម្ចាស់ TIK TOK ឈ្មោះ​ NHA ROMANO ដែលបង្ហោះព័ត៌មានមិនពិតអំពីនាង ចេញមុខសុំទោសជាសាធារណៈក្នុងរយៈពេល៧ថ្ងៃ។

នៅក្នុងលិខិត កញ្ញា ម៉ាច ដាវី បានឱ្យដឹងថា ​ម្ចាស់ TIK TOK ឈ្មោះ​ NHA ROMANO បានបង្ហោះចែកចាយនូវវីដេអូដែលភ្ជាប់ជាមួយរូបថត និងសំណេរថា «ក្តៅគគុកដូចបាយពុះ ផេកស្ថាបនាបានចោទប្រកាន់ដាវីធ្ងន់ៗថា ហៅប្តីខ្លួនឯងមកមើលការប្រកួតរបស់ខ្លួន» ព្រមទាំងភ្ជាប់ជាមួយរូបភាពនៃការបង្ហោះហ្វេសបុករបស់ម្ចាស់ផេក Sathapana Pagaent និងបានធ្វើអត្ថាធិប្បាយជាសម្លេងលើវីដេអូបង្ហោះនោះថែមទៀតផង។ កញ្ញាបានបញ្ចាក់ថា គណនីហ្វេសបុកផេកឈ្មោះ Sathapana Pagaent ជាគណនីហ្វេសបុកផេកដែលទើបតែប្តូរឈ្មោះពី Dariya Khun មកជា Sathapana Pagaent ហើយម្ចាស់គណនីនេះត្រូវបាននាងដាក់ពាក្យបណ្ដឹងទៅតុលាការព្រហ្មទណ្ឌរួចរាល់ ផងដែរ។

កញ្ញា ម៉ាច ដាវី បានស្នើសុំឲ្យម្ចាស់Tiktok ខាងលើ បញ្ឈប់ និងលុបរាល់សំណេរ វីដេអូ និងសារជាអក្សរ ជារូបភាព ជាសម្លេង ឬជាវីដេអូដែលបានបង្ហោះតាមបណ្តាញសង្គម Tik Tok ព្រមទាំងធ្វើការសុំទោសរូបនាងជាសាធារណៈក្នុងរយៈពេល៧ថ្ងៃ គិតពី ពេលដែលបានចេញលិខិតនេះជាកំហិត បើមិនដូច្នោះទេ រូបនាងនឹងចាត់វិធានការទៅតាមផ្លូវច្បាប់៕ រូបភាព Miss grand cambodia/ Miss grand ratanakiri