មួយរយៈនេះ ក្រុមហ៊ុន Samsung ហាក់ដូចជាមិនបន្ធូរដៃទៀតឡើយ ក្នុងការបញ្ចេញស្មាតហ្វូនរបស់ខ្លួន ក្រោយពីការមកដល់របស់ ត្រកូល Galaxy S10 មក យើងឃើញថា Samsung បានបញ្ចេញនូវស្មាតហ្វូនលំដាប់ថវិការមកជាបន្តបន្ទាប់។ ឥឡូវ Galaxy A80 បានបង្ហាញខ្លួនមួយទៀតហើយដែល Galaxy A50 ទើបតែបានដាក់លក់ក្នុងពេលថ្មីៗនេះ Galaxy A80 ជាស្មាតហ្វូនដែលមានរូបរាងប្លែកពីស្មាតហ្វូនផ្សេងៗរបស់ Samsung ដោយរូបរាងរបស់វាមានផ្ទៃអេក្រង់លាតពេញតែម្ដងគ្មានឆក គ្មានប្រជ្រុយ ដែលវាបានប្រើប្រាស់ជាកាមេរ៉ាហូតឡើងមកវិញ ។

បើសិនជាយើងចង់ថតរូបសែលហ្វី កាមេរ៉ាវានឹងលូតឡើងមកហើយបង្វិលត្រឡប់មកខាងមុខធ្វើជាកាមេរ៉ាសែលហ្វីវិញ ការធ្វើដូច្នេះ រូបភាពសែលហ្វីរបស់អ្នកនឹងកាន់តែមានគុណភាពខ្ពស់ជាងមុន ព្រោះតែកាមេរ៉ាខាងក្រោយ និងកាមេរ៉ាខាងមុខប្រើប្រាស់កាមេរ៉ាតែមួយជាមួយគ្នា ។ Galaxy A80 នេះមានកាមេរ៉ាបីគ្រាប់ ដែលទីមួយមានទំហំ 48 មេហ្កាភិចសែល f2.0 ទីពីរមានទំហំ 8 មេហ្កាភិចសែល ដែលសម្រាប់ថតប្លង់ទូលាយ 123ដឺក្រេ ហើយចុងក្រោយនេះជាប្រភេទ 3D ToF ដែលប្រើប្រាស់សម្រាប់ការថត Live Focus ។

សម្រាប់អេក្រង់ វាមានទំហំរហូតដល់ 6.7 អ៊ីញ ប្រភេទ AMOLED មាន resolution 1080 x 2400 ភិចសែល និងប្រើប្រាស់បន្ទះស្កែនក្រយ៉ៅដៃលើអេក្រង់ផងដែរ ។ Galaxy A80 មានទំហំថ្ម 3700mAh មានមុខងារសាកថ្មលឿនកម្លាំង 25W ផងដែរ ឯទំហំ RAM គឺដល់ទៅ 8GB និងអង្គផ្ទុកទិន្នន័យ 128GB ផង តែមិនមានរន្ធបន្ថែមខាងក្រៅទេ វារត់ដោយ Android P ជាមួយនិងស្បែក OneUI ។ Galaxy A80 នឹងមានជម្រើសបីពណ៌ Phantom Black, Angel Gold និង Ghost White វានឹងផ្លាស់ប្តូរពណ៌បន្តិចបន្តួចពេលដែលត្រូវជាមួយនឹងពន្លឺ ។ Samsung Galaxy A80 នឹងមានតម្លៃ 649 ផោន (730 ដុល្លារអាមេរិក) ហើយនឹងដាក់លក់ចាប់ពីថ្ងៃទី 29 ខែឧសភា នៅទីផ្សារបរទេស៕

អត្ថបទ៖ ឧស្សាហ៍

ប្រភព៖ gsmarena