ខេត្តបន្ទាយមានជ័យ៖ នៅថ្ងៃទី២៩ ខែកញ្ញា ឆ្នាំ២០២៤ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា រូបចម្លាក់ដែលធ្វើអំពីថ្មខ្សាច់ចំនួនពីរ។ ទីមួយជារូប​សំណាកបុរសជាងចម្លាក់ដោយនៅក្នុងដៃមានកាន់ញញួរ និងពន្លាក និងរូបមួយទៀតជារូបតោដ៏មានអំណាច ត្រូវបានរដ្ឋបាលស្រុកព្រះ​នេត្រព្រះ ខេត្តបន្ទាយមានជ័យលើកតម្កល់នៅសួនស្រះជប់ ខាង​មុខសាលាស្រុក ជាប់ផ្លូវជាតិលេខ៦ នាភូមិចក្រី ឃុំជប់វារី ស្រុកព្រះ​នេត្រព្រះ ខេត្តបន្ទាយមានជ័យ។ ការតម្កល់រូបសំណាក​នេះ​បន្ទាប់​ពីទទួល​បានការអនុញ្ញាតពីក្រសួងមហាផ្ទៃសម្រាប់ប្រើប្រាស់ជានិមិត្តរូបរបស់ស្រុកព្រះនេត្រព្រះ។

រូបនិមិត្តរូបស្រុកព្រះនេត្រព្រះនេះត្រូវណែនាំឱ្យឆ្លាក់ពីថ្មខ្សាច់ពណ៌ក្រហម ដោយជាងចម្លាក់ឈ្មោះ ញ៉ែម កេន នៅភូមិភ្នំជញ្ជាំង ឃុំជប់វារី ។ ទំហំរូប​ជាងនិងតោ កម្ពស់១,៧ម៉ែត្រ,បល្ល័ង្កកម្ពស់០,៤ម៉ែត្រ, បណ្តោយ១,៤ម៉ែត្រ​, ទទឹង០,៨ម៉ែត្រ។

មិនមែនជារឿងចៃដន្យទេក្នុងការដាក់រូបសំណាកនេះ ពីព្រោះទីនេះ​មានប្រវត្តិជាយូរលង់ទាក់ទងនឹងរបរជាប្រពៃណីរបស់ប្រជាជន​​ស្រុក​ព្រះនេត្រព្រះ ពិសេសប្រជាជននៅឃុំជប់វារី ដែលនៅជាប់​នឹងភ្នំជញ្ជាំង​នេះតែម្តង គឺរបរចម្លាក់ថ្ម។ ក្រសួងមហាផ្ទៃបានទទួលស្គាល់ជាផ្លូវការ​ក្នុងការអនុញ្ញាតឱ្យប្រើប្រាស់រូបសំណាកជានិមិត្តរូបស្រុក។ ស្រុកព្រះនេត្រ​ព្រះមានសហគមន៍ជីករ៉ែ ថ្មនិងចម្លាក់ថ្មដ៏ធំបំផុតនិងតែមួយគត់​ក្នុងខេត្ត​បន្ទាយមានជ័យ នៅភូមិភ្នំជញ្ជាំង ​ឃុំជប់វារី ដែលស្ថិត​ត្រង់ប្រជុំជនស្រុក។

ម្យ៉ាងទៀតប្រជុំជនស្រុកនេះ ក៏មានមរតកធម្មជាតិមានតែមួយ​គត់ក្នុង​ខេត្តដែរ គឺទឹកជប់ ជាទឹកហូរចេញពីក្នុងដីដែលបច្ចុប្បន្ន មានស្រះទឹកថ្លា​យង់​ដ៏ធំមួយនៅខាងមុខសាលាស្រុក។

តាមការបញ្ជាក់របស់លោក ឃូ ពៅ អភិបាលស្រុកព្រះនេត្រព្រះ របរចម្លាក់ថ្ម ជាមរតកពីដូនតារាប់រយឆ្នាំមកហើយ។ របរប្រពៃណី​នេះបានងើបឡើងវិញនៅឆ្នាំ១៩៨៧ហើយផុលផុស និងដំណើរ​ការខ្លាំងចាប់ពីឆ្នាំ២០០២មកខណៈវិស័យអចលនទ្រព្យ វិស័យ​ទេសចរណ៍ និងសេដ្ឋកិច្ច សង្គម មានសម្ទុះខ្លាំង។

នៅទីនេះមានសិប្បកម្មចម្លាក់ថ្មជារូប និងសិប្បកម្មកាត់ជាការ៉ូ និងឥដ្ឋជាង ២០កន្លែង។ ក្នុងនោះ ក៏មានចម្លាក់រូបអនុស្សារីយ៍ និងចម្លាក់ព្រះ​ពុទ្ធ​បដិមា រូបចម្លាក់ផ្សេងៗមានតម្លៃខ្ពង់ម៉ឺនដុល្លារក៏មានដែរ។

លោក ឃូ ពៅ ធ្លាប់បានប្រាប់ថា អាជ្ញាធរនិងជំនាញបានបង្ក​លក្ខណៈ​ងាយស្រួលលើកទឹកចិត្តនិងជំរុញឱ្យសហគមន៍ចម្លាក់ថ្មភ្នំជញ្ជាំង​​នេះបន្តថែរក្សាប្រវត្តិប្រពៃណី មរតក និងចលនាជា”ភូមិមួយ ផលិតផលមួយ”។ ឋផលិតផលចម្លាក់ថ្មភ្នំជញ្ជាំងនេះ បានជួយ​លើកមុខមាត់កេរ្តិ៍ឈ្មោះភូមិស្រុកភូមិផងដែរ។ដូចនេះមានថែក្សា​ប្រពៃណីនិងប្រភពចំណូលមិនរីងស្ងួតរបស់ពលរដ្ឋ តាមរយៈការ​ទទួលផលដោយផ្ទាល់ និងដោយប្រយោល។

ក្នុងពេលលើករូបសំណាកតម្កល់ជាផ្លូវការកាលពីថ្ងៃទី២៦ ខែកញ្ញា ឆ្នាំ២០២៤ មានវត្តមានលោក ឃូ ពៅអភិបាលស្រុក,លោក កែវ ប៊ុនយឿន ប្រធានក្រុមប្រឹក្សាស្រុក ព្រមទាំងមន្រ្តីនៃរដ្ឋបាល​ស្រុកជាច្រើនរូបចូលរួម។

លោក ឃូ ពៅ បានប្រាប់ឱ្យដឹងថា រដ្ឋបាលស្រុកបានចំណាយ​ថវិកា​លើការឆ្លាក់រូបនេះ ក្នុងនោះលោក ញ៉ែម កេន ជាងចម្លាក់ក៏បានចូល​រួមជួយផងដែរ មានបង្កាន់ដៃថ្មលើខឿនបេតុង។ លោកបន្តថា ការលើក​មកតម្កល់លើខឿននាថ្ងៃនក្ខត្តឬក្សនេះគ្រាន់ជាបណ្តោះអាសន្ន​សិន។ ឯពិធីសម្ពោធផ្លូវការនឹងធ្វើនៅក្រោយបុណ្យភ្ជុំបិណ្ឌ ៕

ប្រភព៖ ក្រសួងព័ត៌មាន