ប៉ាគីស្ថាន៖ យ៉ាងហោចណាស់មានមនុស្សចំនួន ៦នាក់​បានស្លាប់បាត់បង់ជីវិតនៅក្នុងហេតុការណ៍ធ្លាក់ឧទ្ធម្ភាគចក្រមួយគ្រឿងនៅក្នុងប្រទេសប៉ាគីស្ថាន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅល្ងាចថ្ងៃសៅរ៍ ទី២៩ ខែកញ្ញា។ យ៉ាងណាក្តី អត្តសញ្ញាណរបស់ជនរងគ្រោះទាំងអស់ ៦នាក់នោះនៅមិនទាន់មានការបង្ហាញជាសាធារណៈនៅឡើយទេ។

ប្រភពខាងលើបានបន្តថា នៅក្នុងឧទ្ធម្ភាគចក្រមួយគ្រឿងនេះមានផ្ទុកមនុស្សសរុបចំនួន ១៤នាក់ ហើយភ្លាមៗក្រោយមានហេតុការណ៍គ្រោះថ្នាក់ គេបានប្រទះឃើញមានមនុស្សចំនួន ៦នាក់បានស្លាប់នៅនឹងកន្លែងកើតហេតុ ខណៈអ្នកដំណើរចំនួន ៨នាក់ផ្សេងទៀតបានរងរបួសធ្ងន់ធ្ងរនិងត្រូវបញ្ជូនទៅព្យាបាលនៅមន្ទីរជាបន្ទាន់។ បើតាមអាជ្ញាធរប៉ាគីស្ថានបានបញ្ជាក់ថា ឧទ្ធម្ភាគចក្រដែលបានជួបឧប្បតិ្តហេតុខាងលើនេះគឺជាឧទ្ធម្ភាគចក្ររបស់ក្រុមហ៊ុនឯកជនមួយកន្លែងដែលមានទីតាំងស្ថិតនៅក្នុងខេត្ត Khyber Pakhtunkhwa ភាគខាងជើងនៃប្រទេសប៉ាគីស្ថាន៕

 អត្ថបទ៖ ភក្តី

ប្រភព៖ The Strait Time