ចំពោះអ្នកតាមដានវិស័យបវរកញ្ញាប្រាកដជាបានដឹងហើយថា ប្រទេសកម្ពុជាបានធ្វើជាម្ចាស់ផ្ទះក្នុងកម្មវិធី Miss Planet International 2024 ហើយក៏បានទទួលស្វាគមន៍បេក្ខភាពជិត ៧០ ប្រទេសដែលមកពីជុំវិញពិភបលោក កាលពីថ្ងៃទី ១៩ ខែវិច្ឆិកា ឆ្នាំ ២០២៤ និងមានការប្រកួតក្នុងវគ្កជាច្រើននៅឯខេត្តសៀបរាមផងដែរ។

ជាក់ស្ដែង គិតត្រឹមថ្ងៃទី ២៧ ខែវិច្ឆិកា ឆ្នាំ ២០២៤ នេះ កម្មវិធី Miss Planet International 2024 បានដើរមកដល់វគ្គផ្ដាច់ព្រ័ត្រក្នុងយប់នេះហើយ។ ជាមួយគ្នានេះផងដែរ បេក្ខភាពដែលតំណាងឱ្យប្រទេសកម្ពុជា ចូលរួមប្រកួតកម្មវិធីខាងលើនេះគឺ កញ្ញា ដេត ស្រីនាថ ប៉ុន្តែបវរកញ្ញារូបនេះ មានបញ្ហាសុខភាពមិនអាចចូលរួមប្រកួតកម្មវិធី Miss Planet International 2024 ក្នុងវគ្គផ្ដាច់ព្រ័ត្រយប់នេះបានឡើយ។

ដោយឡែក ខាងកម្មវិធី Miss Planet International 2024 ក៏បានប្រកាសជាផ្លូវការ ចំពោះបេក្ខភាពតំណាងឱ្យកម្ពុជាក្នុងការប្រកួតយប់នេះគឺ បវរកញ្ញា ខន សុវណ្ណសូនីតា ដែលជាលំដាប់រងទី ១ នៃកម្មវិធី Miss Planet Cambodia 2024 ជាមួយការស្វាគមន៍ពីអ្នកតាមដានវិស័យបវរកញ្ញា រួមទាំង ខន សុវណ្ណសូនីតា ក៏បានបង្ហាញពីឆន្ទៈរបស់ខ្លួនក្នុងការប្រកួតយប់់នេះថា៖ «នាងខ្ញុំ ខន សុវណ្ណសូនីតា នឹងប្តេជ្ញាចិត្តក្នុងការតំណាងកម្ពុជានៅលើឆាកអន្តរជាតិនៅរយៈពេលប៉ុន្មានម៉ោងខាងមុខនេះ សូមពុកម៉ែបងប្អូន ចូលរួមលើកទឹកចិត្តនឹងគាំទ្រនាងខ្ញុំផង»៕