មិនក្រទេណា! ក្រុមហ៊ុន Samsung ជះលុយ 7ពាន់លានដុល្លារបន្ថែម ដើម្បីជម្រុញផលិតកម្មលើផលិតផល Memory

ជាការពិតណាស់ Samsung គឺជាក្រុមហ៊ុនឈានមុខគេផ្នែកផលិតផលអេឡិចត្រូនិក ហើយនាពេលថ្មីៗនេះ Samsung ចង់ពង្រឹងទីតាំងរបស់ខ្លួនបន្ថែមទៀត ដោយការវិនិយោគយ៉ាងខ្លាំងទៅលើខ្សែផលិតកម្មរបស់ខ្លួន។ ដោយឡែក កាលពីកំឡុងខែមិនា ឆ្នាំមុន យើងធ្លាប់បានជម្រាបម្ដងរួចមកហើយថា ក្រុមហ៊ុនបានជះលុយរហូតដល់ទៅ 8.7ពាន់លានដុល្លារដើម្បីសាងសង់ខ្សែផលិតកម្មថ្មីសម្រាប់បន្ទះឈីប Memory NAND ក្នុងទីក្រុង Hwaseong ប្រទេសកូរ៉េខាងត្បូង និងក្នុងទីក្រុង Xian ប្រទេសចិន។

រហូតមកដល់ពេលបច្ចុប្បន្ន យើងទទួលបានពត៌មានថ្មីទៀតហើយពីប្រទេសកូរ៉េខាងត្បូង ដែលបញ្ជក់ថា ក្រុមហ៊ុន Samsung កំពុងមានគម្រោងពង្រីកបន្ថែមនូវសង្វាក់ផលិតកម្មបន្ទះឈីប Memory NAND សម្រាប់ទីតាំងទីក្រុង Xian ប្រទេសចិន។ ចំពោះមូលហេតុដែលក្រុមហ៊ុនសម្រេចធ្វើបែបនេះ គឺដោយសារតម្រូវការទីផ្សារខ្ពស់ពេក។

ការកើនឡើងនូវតម្រូវការឧបករណ៍អេឡិចត្រូនិក បានធ្វើឲ្យក្រុមហ៊ុន Samsung ត្រូវតែពង្រីកមូលដ្ឋានផលិតកម្មរបស់ខ្លួន ដើម្បីរក្សាការកាន់កាប់លំដាប់កំពូលនៅលើទីផ្សារដដែល។ ដូច្នេះ ក្រុមហ៊ុននេះបានសម្រេចវិនិយោគនៅក្នុងខ្សែសង្វាក់ផលិតកម្មបន្ទះឈីបថ្មីមួយនៅរោងចក្រ Pyeongtaek របស់ខ្លួន ក្នុងប្រទេសកូរ៉េខាងត្បូងកាលពីខែមុន។

គួរបញ្ជាក់ផងដែរថា រោងចក្រ Pyeongtaek ត្រូវបានសាងសង់ប្រហែលជាពីរឆ្នាំមកហើយ ឯការផលិតបន្ទះឈីប V-NAND ជំនាន់ទីបួន បានចាប់ផ្តើមតាំងពីខែកក្កដា ឆ្នាំ2017 មកម្លេះ។ ដោយសារតម្រូវការកាន់តែខ្ពស់ ក្រុមហ៊ុន Samsung ត្រូវការការពង្រីកបន្ថែមនូវរោងចក្ររបស់ខ្លួនក្នុងទីក្រុង Xian ឲ្យបានក្នុងចុងខែនេះ ហើយសម្រាប់ខ្ទង់ចំណាយ គឺរហូតដល់ទៅ 7ពាន់លានដុល្លារឯណោះ។

Fu

ប្រភព៖ sammobile