សោកស្តាយ! ពិធីការិនីព័ត៌មានដ៏ល្បី នូ មៈនេត្រអាថាណ្ណា បានទទួលមរណភាព ទាំងវ័យក្មេង

នៅព្រឹកថ្ងៃទី ២៧ ខែមករា ឆ្នាំ ២០២៥ នេះ ដំណឹងមរណភាពពិធីការិនីព័ត៌មាន នូ មៈនេត្រអាថាណ្ណា បានធ្វើឱ្យមហាជនមានការភ្ញាក់ផ្អើលជាខ្លាំង ក្រោយឃើញគណនីផ្ទាល់ខ្លួនរបស់ ឯកឧត្តម ជុំ កុសល រដ្ឋលេខាធិការក្រសួងព័ត៌មាន បានបង្ហោះសាររំលែកទុក្ខ ក៏ដូចជាលោកស្ដាយជាខ្លាំង ចំពោះការបាត់បង់នូវពិធីការិនីព័ត៌មានដ៏ពូកែមួយរូបនេះ។

ដោយឡែក បើយោងតាមគណនីរបស់ បងស្រីរបស់ នូ មៈនេត្រអាថាណ្ណា បានឱ្យដឹងថា នូ មៈនេត្រអាថាណ្ណា បានទទួលមរណភាព ក្នុងជន្មាយុ ៣៧ឆ្នាំ នៅថ្ងៃទី ២៦ ខែមករា ឆ្នាំ ២០២៥ វេលាម៉ោង ១១:០៦ នាទីយប់ ដោយសារជំងឺមហារីក។ ជាមួយគ្នានេះផងដែរ បងស្រីរបស់ នូ មៈនេត្រអាថាណ្ណា បានបញ្ជាក់បន្ថែមថា ចំពោះសពប្អូនស្រីអាចនឹងមកដល់កម្ពុជា នៅថ្ងៃខានស្អែក ដោយសារ នូ មៈណេត្តថាណា បានផុតនៅមន្ទីរពេទ្យក្នុងប្រទេសថៃ។

គួរបញ្ជាល់ផងដែរថា ពិធីបុណ្យសពរបស់ ពិធីការិនី នូ មៈនេត្រអាថាណ្ណា នឹងធ្វើឡើង បន្ទាប់ពីសាកសពបានដឹងមកដល់កម្ពុជា ចំពោះទីតាំងធ្វើពិធីបុណ្យសពនៅ បុរីវិមាន ភ្នំពេញ ៥៩៨៕

ប្រភព៖ Kosal Chum

ប្រភព៖ MaDa HP