អ្នកនាំពាក្យរដ្ឋបាលខេត្តសៀមរាប បញ្ជាក់ថា សួនព្រះរាជដំណាក់ពុំមានការប្ដូរឈ្មោះឡើយ រីឯសួនតេជោសន្តិភាព ជាឈ្មោះផ្លូវការសួនមួយទៀត

(ខេត្តសៀមរាប)៖ នៅព្រឹកថ្ងៃទី ១១ ខែកុម្ភៈ ឆ្នាំ ២០២៥ នេះ អ្នកនាំពាក្យរដ្ឋបាលខេត្តសៀមរាប បានបញ្ជាក់ថា សួនព្រះរាជដំណាក់ពុំមានការប្ដូរឈ្មោះឡើយ គឺស្ថិតនៅដដែល។ សួនតេជោសន្តិភាព ជាឈ្មោះផ្លូវការសួនមួយទៀតដោយឡែក ពុំមានពាក់ព័ន្ធនឹងសួនព្រះរាជដំណាក់ឡើយ។

ការបញ្ជាក់ខាងលើនេះធ្វើឡើង ដោយសារមានសារព័ត៌មានមួយបានចុះផ្សាយថា អ្នកសៀមរាបមិនពេញចិត្តនឹងការប្តូរឈ្មោះ «សួនព្រះរាជដំណាក់» ទៅជា «សួនតេជោសន្តិភាព» ពួកគេយល់ឃើញថា អាជ្ញាធរកំពុងព្យាយាមលុបបំបាត់ទីតាំងប្រវត្តិសាស្ត្ររបស់ព្រះមហាក្សត្រជំនាន់មុនៗ ដែលភ្ញៀវទេសចរតែងតែធ្វើដំណើរកម្សាន្តក្នុងតំបន់នោះ៕

ប្រភព៖ រដ្ឋបាលខេត្តសៀមរាប