Huawei ប្រកាសក្តែងៗថា ប្រតិបត្តិការ Android របស់ Google ដើរមិនលឿនដូចប្រតិបត្តិការ ហុងម៉េង របស់ខ្លួនឡើយ

ក្តីសង្ឃឹមរបស់ក្រុមអ្នកប្រើប្រាស់ទូរស័ព្ទ HUAWEI ហាក់មិនទាន់អស់នៅឡើយទេ ក្រោយអគ្គនាយកក្រុមហ៊ុនមួយនេះបានប្រកាសជាសាធារណៈថា ប្រព័ន្ធប្រតិបត្តិការណ៍ OS ថ្មីរបស់ HUAWEI នឹងល្អជាង ហើយដើរលឿនជាងប្រព័ន្ធប្រតិបត្តិការណ៍ Android រហូត ៦០% ទៀតផង។ តាមការរំពឹងទុក ប្រព័ន្ធប្រតិបត្តិការណ៍ OS របស់ HUAWEI នឹងត្រូវដាក់ឲ្យដំណើរការនៅក្នុងខែ តុលា​ ខាងមុខនេះ។ បើតាមការចុះផ្សាយនៅក្នុងសារព័ត៌មាន GOODYFEED បានឲ្យដឹងថា ដ្បិតតែ Google បានសម្រេចចែកផ្លូវគ្នាជាមួយនឹង HUAWEI ក៏ពិតមែន តែ Google នៅមិនទាន់ធ្វើការហាមឃាត់ទូរស័ព្ទ HUAWEI ទាំងអស់មិនឲ្យប្រើប្រាស់ប្រព័ន្ធប្រតិបត្តិការណ៍ ANDROID ភា្លមៗនោះទេ ពោលគឺទុករយៈពេលបញ្ចប់កុងត្រា ៩០ ថ្ងៃ ដែលមានន័យថា កុងត្រាផ្លូវការនឹងត្រូវបញ្ចប់នៅថ្ងៃ ១៩ ខែសីហា ឆ្នាំ ២០១៩ ខាងមុខនេះ។

ក្នុងរយៈពេលបីខែនេះគេរំពឹងថា រឿងល្អៗជាច្រើនអាចកើតមានឡើង រួមទាំងការសម្រេចឲ្យប្រើប្រាស់នូវប្រព័ន្ធប្រតិបត្តិការណ៍ថ្មីរបស់ HUAWEI ផងដែរ។ ដូចនេះសម្រាប់អ្នកប្រើប្រាស់ទូរស័ព្ទ HUAWEI ទាំងអស់កុំទាន់អស់សង្ឃឹម​​ និងបោះទូរស័ព្ទខ្លួនចោល ហើយរង់ចាំប្រើប្រាស់ប្រព័ន្ធប្រតិបត្តិការណ៍ថ្មីរបស់ HUAWEI ទាំងអស់គ្នា៕

អត្ថបទ៖ ភក្តី

ប្រភព៖ goodyfeed