កម្ពុជាត្រៀមដាក់ដំណើរការ Super App សម្រាប់ទាក់ទាញភ្ញៀវទេសចរ និងវិនិយោគិន

យោងតាម ក្រសួងព័ត៍មាន កាលពីថ្ងៃទី ២១ ខែ វិច្ឆិកា ឆ្នាំ ២០២៥ បានឱ្យដឹងថា ទីស្តីការក្រសួងទេសចរណ៍ ថ្ងៃទី២០ ខែវិច្ឆិកា ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកជំទាវ មាស សុភារ័ត្ន ប្រធានក្រុមប្រឹក្សាភិបាលក្រុមហ៊ុន សាម៉ាឌី ប្រផឹធី & ហសភីថលលីធី ឯ.ក និង ATMOSPHERE CORE PRIVATE LIMITED និងសហការី ចូលជួបសម្តែងការគួរសម និងពិភាក្សាការងារ ដើម្បីបង្ហាញពីគម្រោងវិនិយោគលើផ្នែកសណ្ឋាគារ និងបដិសណ្ឋារកិច្ចនៅកម្ពុជា ពិសេសការផ្តល់កិច្ចសហប្រតិបត្តិការដ៏ល្អទាក់ទងនឹងការលើកកម្ពស់ទេសចរណ៍ឌីជីថល តាមរយៈការបង្កើត Super App សម្រាប់វិស័យទេសចរណ៍នៅកម្ពុជា ពោលគឺដើម្បីចូលរួមការលើកកម្ពស់វិស័យទេសចរណ៍ក្នុងការទាក់ទាញវិនិយោគិន និងភ្ញៀវទេសចរបរទេសឱ្យអញ្ជើញមកវិនិយោគ និងទស្សនានៅកម្ពុជាដ៏បវរនៃយើង។

ក្នុងកិច្ចជំនួបប្រកបដោយផ្លែផ្កានេះ ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅ និងកោតសរសើរកោតសរសើរចំពោះការនាំដៃគូសហការមកពិភាក្សាបន្ថែមទៀតអំពីការអភិវឌ្ឍ និងការវិនិយោគលើវិស័យរមណីយដ្ឋាន សណ្ឋាគារ និងបដិសណ្ឋារកិច្ចនៅកម្ពុជា។

ដើម្បីលើកកម្ពស់វិស័យទេសចរណ៍បន្ថែមទៀតទៅកាន់ទីផ្សារសកលលោក ឯកឧត្តមរដ្ឋមន្ត្រី បានគាំទ្រចំពោះគំនិតផ្តួចផ្តើម និងគម្រោងរបស់ក្រុមហ៊ុននៅក្នុងប្រទេសកម្ពុជា និងស្នើសុំឱ្យក្រុមហ៊ុនផ្សព្វផ្សាយគោលដៅទេសចរណ៍របស់កម្ពុជាទៅទូទាំងពិភពលោក ហើយក្រសួងទេសចរណ៍ត្រៀមខ្លួនជាស្រេចដើម្បីផ្តល់កិច្ចសហការជាមួយដៃគូក្រុមហ៊ុនក្នុងការរៀបចំព្រឹត្តិការណ៍ផ្សព្វផ្សាយទេសចរណ៍រួមគ្នា និងសហការរៀបចំដំណើរកម្សាន្ត FAM Trip ជាដើម៕

ប្រភព៖ ក្រសួងព័ត៍មាន