BREAKING NEWS! ទីបំផុតលោក ត្រាំ បើកផ្លូវឱ្យ Huawei រកស៊ីជាមួយអាមេរិកវិញហើយ

ប្រធានាធិបតីអាមេរិកលោក ដូណាល់ ត្រាំ និងសមភាគីចិនលោក ស៊ី ជីនពីង សម្រេចផ្អាកសង្រ្គាមពាណិជ្ជកម្មរវាងសហរដ្ឋអាមេរិក និងប្រទេសចិន នៅឯកិច្ចប្រជុំកំពូល G20 នៅក្នុងប្រទេសជប៉ុន។ ហើយដូចដែលយើងសង្ស័យផងដែរថា ក្រុមហ៊ុន Huawei ត្រូវបានគេប្រើជាកូនអុកនៅក្នុងកិច្ចចរចានេះ។ Bloomberg បានរាយការណ៍ថា សហរដ្ឋអាមេរិកទទួលបានលក្ខខណ្ឌអំណោយផលលើកិច្ចព្រមព្រៀងមួយ ដែលតម្រូវឱ្យប្រទេសចិនទិញបរិមាណផលិតផលកសិកម្ម «ដ៏ច្រើន» ពីអាមេរិក នេះបើយោងតាមសម្ដីរបស់លោក ត្រាំ ជាអ្នកអះអាង។

ដើម្បីជាការឆ្លើយតប ប្រធានាធិបតីអាមេរិកលោក ដូណាល់ ត្រាំ បាននិយាយថា៖ «ក្រុមហ៊ុនអាមេរិកអាចលក់ឧបករណ៍របស់ខ្លួនទៅឱ្យក្រុមហ៊ុន Huawei បាន។ យើងកំពុងសំដៅអំពីឧបករណ៍ដែលមិនមានបញ្ហាសន្តិសុខជាតិ»។

ប្រសិនបើសេចក្តីថ្លែងការណ៍នេះ និងបទឈប់បាញ់នោះពិតជារឹងមាំមែននោះ វានឹងអាស្រ័យលើក្រុមហ៊ុននានាដូចជា៖ Google, ARM Holdings, Qualcomm និងអ្នកផ្គត់ផ្គង់ឱ្យក្រុមហ៊ុន Huawei ដទៃទៀតនៅសហរដ្ឋអាមេរិក ឬប្រើបច្ចេកវិទ្យាអាមេរិក ដើម្បីសម្រេចថា នឹងចាប់ផ្តើមអាជីវកម្មជាមួយក្រុមហ៊ុនចិនសារជាថ្មី ឬយ៉ាងណា។

វាក៏ហាក់ដូចជាការហាមឃាត់ត្រូវបានធ្វើឡើងអស់រយៈពេលជាច្រើនខែមកហើយ ប៉ុន្តែការពិតវាទើបតែមានរយៈពេល ៦សប្តាហ៍ ចាប់តាំងពីក្រសួងពាណិជ្ជកម្មសហរដ្ឋអាមេរិកបានដាក់ក្រុមហ៊ុន Huawei នៅក្នុងបញ្ជីខ្មៅរបស់ខ្លួន និងរារាំងក្រុមហ៊ុនមិនឱ្យចូលប្រើសង្វាក់ផ្គត់ផ្គង់នៅសហរដ្ឋអាមេរិក។ ក្រុមហ៊ុនដូចជា Google ក៏បានប្រកាសថា ពួកគេបានកាត់ផ្តាច់ទំនាក់ទំនងជាមួយក្រុមហ៊ុន Huawei ដោយសារការហាមឃាត់នេះ។ ដោយកំពុងតែគិតថា ក្រុមហ៊ុន Huawei បានចំណាយត្រឹមតែ ១១ ពាន់លានដុល្លារលើការផ្គត់ផ្គង់របស់សហរដ្ឋអាមេរិកកាលពីឆ្នាំមុន យើងអាចនឹងប៉ាន់ស្មានបានថា ក្រុមហ៊ុនទាំងនេះកំពុងបារម្មណ៍រឿងចាប់ផ្តើមដឹករកស៊ីជាមួយក្រុមហ៊ុន Huawei ម្តងទៀត៕

អត្ថបទ៖ លីដា