ស្លាប់ច្រើនពេក វៀតណាមត្រៀមផ្ដល់វ៉ាក់សាំងមហារីកមាត់ស្បូនទ្រង់ទ្រាយធំ ឲ្យក្មេងស្រីៗ
ជំងឺមហារីកមាត់ស្បូន បង្កឡើងដោយមេរោគ HPV (Human Papilloma Virus) ហើយឧស្សាហ៍ជួបប្រទះបំផុតលើស្រ្ដីពាសពេញពិភពលោក។ ជំងឺមហារីកមាត់ស្បូន អាចព្យាបាលបាននៅដំណាក់កាលដំបូង ប៉ុន្ដែប្រសិនយើងមិនធ្វើតេស្ដពិនិត្យជំងឺនេះមុនទេ វាអាចឈានដល់ស្ថានភាពមួយ ដែលបាត់បង់ឱកាសព្យាបាលប្រកបដោយប្រសិទ្ធភាព។
ពេលនេះ ក្រសួងសុខាភិបាលវៀតណាម គ្រោងផ្ដល់វ៉ាក់សាំងបង្ការជំងឺមហារីកមាត់ស្បូន ដល់ក្មេងស្រីៗ ដោយសារជំងឺនេះ បានឆក់យកជីវិតស្រ្តី ប្រមាណ ៧នាក់/ថ្ងៃ។ ដំណាក់កាលដំបូង ក្រសួងសុខាភិបាល នឹងដាក់បញ្ចូលវ៉ាក់សាំង HPV ក្នុងកម្មវិធីវ៉ាក់សាំងជាតិ ទ្រង់ទ្រាយធំ ដោយអនុវត្តនៅក្រុងហាណូយ ខេត្ត Quang Ninh ខេត្ត Khanh Hoa ខេត្ត Dong Thap និងក្រុង Can Tho ។
តាមការចេញផ្សាយរបស់កាសែតក្នុងស្រុកវៀតណាម Suc Khoe & Doi Song (Health & Life) ក្នុង ១ថ្ងៃ មានស្រ្តីវៀតណាម ១២នាក់ មានរោគសញ្ញាជំងឺមហារីកមាត់ស្បូន ហើយ ៧នាក់ស្លាប់ដោយជំងឺនេះ។
តាមមូលនិធិប្រជាជនរបស់អង្គការសហប្រជាជាតិ នៅក្នុងប្រទេសវៀតណាម បញ្ជាក់ថា ការរួមផ្សំជាយុទ្ធសាស្ត្រ នៃការផ្ដល់វ៉ាក់សាំង HPV សម្រាប់ក្មេងស្រីៗ ការតេស្តពិនិត្យជំងឺមហារីកមាត់ស្បូន និងការព្យាបាលបានត្រឹមត្រូវ សម្រាប់ស្ត្រី អាចបំបាត់ជំងឺមហារីកមាត់ស្បូន ចេញពីបញ្ហាសុខភាពសាធារណៈបាន។
ក្នុង ១ឆ្នាំ មានមនុស្ស ប្រមាណ ៣០ម៉ឺននាក់ ទូទាំងពិភពលោក ស្លាប់ដោយសារជំងឺមហារីកមាត់ស្បូន ដោយ ៨៥% រស់នៅប្រទេសកំពុងអភិវឌ្ឍន៍។ នេះបើតាមអង្គការសុខភាពពិភពលោក (WHO)។
ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ