នាយកដ្ឋានជំងឺឆ្លង៖ ជនជាតិចិនមានផ្ទុកវីរុសកូរ៉ូណាថ្មី សង្ឃឹមជាសះស្បើយឡើងវិញ
អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លង លោកវេជ្ជបណ្ឌិត លី សូវ៉ាន់ បានអះអាងថា អ្នកជំងឺជនជាតិចិនដែលរកឃើញមានផ្ទុកវីរុសកូរ៉ូណាថ្មីនោះ សង្ឃឹមនឹងជាសះស្បើយឆាប់ៗនេះ។ លោកវេជ្ជបណ្ឌិតថា លោក JIA JIANHUA គ្មានរោគសញ្ញាអ្វីទាំងអស់ពេលនេះ គឺមិនក្តៅខ្លួន ក្អក ឬកណ្តាសនោះទេ គ្រាន់តែលោកឈឺធ្មេញប៉ុណ្ណោះ ដោយសារមានវ័យចំណាស់។
“គាត់អត់មានរោគសញ្ញាអីទេ ក្អក កណ្តាស ក្តៅខ្លួនអីអត់មានទេ គ្រាន់តែតេស្តឃើញវិជ្ជមាននៅឡើយ “។
ទោះបីជាក្រុមអ្នកជំនាញសុខាភិបាលបញ្ជាក់ថា ជនជាតិចិនដែលឆ្លងវីរុសកូរ៉ូណាថ្មីនេះ មានស្ថានភាពសុខភាពល្អ ជាដូចមនុស្សធម្មតាក្តី តែលោកវេជ្ជបណ្ឌិត លី សូវ៉ាន់ ថា ក្រុមគ្រូពេទ្យមិនអនុញ្ញាតឲ្យបុរសជនជាតិចិនរូបនោះចេញក្រៅឡើយ គឺនៅសម្រាកក្នុងបន្ទប់ដាច់តែឯង ហើយក្រុមគ្រូពេទ្យនៅតាមដានបន្តទៀត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ