មានផ្ទៃពោះគួរថែខ្លួនបែបណា ដើម្បីគេចផុតពីវីរុសកូរ៉ូណាថ្មី?
- February 1, 2020
ទោះនៅកម្ពុជាមានត្រឹម១ករណីដែលឆ្លងវីរុសកូរ៉ូណាថ្មីក៏ដោយ តែម៉ាក់ៗដែលកំពុងមានផ្ទៃពោះនៅតែមានការព្រួយបារម្ភពីសុខភាពរបស់ខ្លួន និងកូនក្នុងផ្ទៃ។ ដើម្បីកុំឲ្យគ្នាយើងមានភាពភ័យខ្លាចលោក វេជ្ជបណ្ឌិត ហ៊ាង រតនា ឯកទេសទូទៅ បានឲ្យដឹងថា ម៉ាក់ៗមានផ្ទៃពោះកុំបាច់បារម្ភពេកអី ព្រោះវាអាចនាំឲ្យប៉ះពាល់ដល់កូនក្នុងផ្ទៃទៅវិញទេ។
លោកបន្តទៀតថា ដើម្បីឲ្យយើងស្ងប់ចិត្តម៉ាក់ៗទាំងអស់អាចសាកធ្វើតាមការណែនាំមួយចំនួនខាងក្រោម ជាការធានាសុវត្ថិភាពទម្រាំតែវីរុសនោះត្រូវបានកម្ចាត់ចោល ហើយបញ្ហាអនាម័យគឺជារបងការពារខ្លួនដ៏រឹងមាំសម្រាប់ខ្លួនយើងគ្រប់ៗគ្នា។ មួយវិញទៀតទោះជាមានផ្ទៃពោះមែន តែយើងគ្មានហានិភ័យឆ្លងខ្ពស់ឡើយ គឺដូចជាមនុស្សធម្មតាដែរ ដូចនេះត្រូវអនុវត្ត ៣ ចំណុចនេះ៖
១- គេង និងញ៉ាំឲ្យបានគ្រប់គ្រាន់
បើយើងរវល់តែគិតខ្វល់ខ្វាយខ្លាំង នោះច្បាស់ជាគេងមិនលក់ ញ៉ាំមិនបានហើយ កាលណាតែគេងមិនលក់នាំឲ្យសុខភាពធ្លាក់ចុះ អាចប៉ះពាល់ដល់កូនទាំងមិនបានឆ្លងវីរុសកូរ៉ូណាថ្មី។ តែបើយើងគេង និងញ៉ាំគ្រប់គ្រាន់វិញ អាចជួយពង្រឹងប្រព័ន្ធភាពស៊ាំ ហើយក្រោកឡើងអារម្មណ៍ស្រស់ថ្លាល្អទាំងម៉ាក់ និងកូនក្នុងពោះ។ វីរុសកូរ៉ូណាថ្មីងាយឆ្លងទៅមនុស្សដែលមានប្រព័ន្ធភាពស៊ាំចុះខ្សោយ និងអ្នកមានបញ្ហាសុខភាពស្រាប់ ដូចនេះហើយបានជាយើងត្រូវបំប៉នខ្លួនឲ្យកាន់តែខ្លាំង ទើបមិនងាយឆ្លង ឬបើឆ្លងក៏មិនទ្រុឌទ្រោមដែរ។
២- កុំទៅក្បែរអ្នកមានរោគសញ្ញា
ប្រសិនបើយើងឃើញនរណាម្នាក់មានរោគសញ្ញា ក្ដៅខ្លួន ហៀរសំបោរ ក្អក កុំទៅក្បែរឲ្យសោះ បើទោះជាមិនមែនវីរុសកូរ៉ូណាថ្មី ផ្ដាសាយធម្មតាក៏ឆ្លងទៅមិនល្អសម្រាប់ម៉ាក់ និងកូនក្នុងផ្ទៃ ព្រោះយើងមិនអាចលេបថ្នាំបានតាមចិត្តឡើយ ហើយបើផ្ដាសាយធម្មតាយូរពេក ក៏នាំឲ្យប៉ះពាល់ដល់កូនក្នុងផ្ទៃដែរ។
៣- ពាក់ម៉ាស់ពេលចេញទៅកន្លែងទីប្រជុំជន
មួយវិញទៀត នៅពេលចេញក្រៅ ត្រូវពាក់ម៉ាស់ការពារមិនឲ្យអ្នកដទៃក្អក កណ្ដាស់ ខ្ទាតទឹកមាត់មកប៉ះជាមួយយើង។ យើងពេលមកដល់ផ្ទះត្រូវលាងសម្អាតដៃជាមួយសាប៊ូ ឬងូតទឹកលាងជម្រះខ្លួនប្រាណ ផ្លាស់ប្ដូរសម្លៀកបំពាក់ចាស់ចេញ។
វេជ្ជបណ្ឌិតរូបនេះបានបន្ថែមជាចុងក្រោយថា ករណីវីរុសកូរ៉ូណាថ្មីអាចឆ្លងបាន តាមរយៈមាត់ ច្រមុះ ភ្នែក ពេលសំណាកផ្សេងៗខ្ទាតមកប៉ះ ហើយបើស្បែកដាច់រលាត់ក៏អាចឆ្លងបានដែរ។ ដូចនេះហើយបានត្រូវការពារខ្លួនឲ្យបានត្រឹមត្រូវតាមការណែនាំដូចខាងលើ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post:
អត្តបទទាក់ទង
-
សុខភាពរោគសញ្ញា ១០ យ៉ាង បង្ហាញថាយើងកំពុងខ្វះវីតាមីន C
December 4, 2021
-
សុខភាពតើការទទួលទានកាហ្វេច្រើន នឹងអោយវិវត្តន៏ជាជំងឺទឹកនោមផ្អែមប្រភេទទី២ទេ? (ពន្យល់ដោយលោកវេជ្ជបណ្ឌិត អុឹង បញ្ញារិទ្ធ)
October 10, 2021
-
សុខភាពស្រីៗមានផ្ទៃពោះ ចង់ញ៉ាំទុរេន ត្រូវដឹងរឿងទាំងនេះសិន!
January 25, 2021
-
សុខភាពចំណីអាហារមានដាក់សារធាតុបូរ៉ាក់ ញ៉ាំទៅប៉ះពាល់អីខ្លះ?
January 16, 2021