មន្ទីរពេទ្យទី១ សម្រាប់អ្នកផ្ទុកវីរុសកូរ៉ូណាថ្មីនៅចិនសង់រួចហើយ ប្រើពេលតែ ៨ ថ្ងៃ
- February 3, 2020
មន្ទីរពេទ្យ Huoshenshan ដែលសាងសង់ឡើងសម្រាប់ដោះស្រាយទប់ទល់នឹងជំងឺផ្លូវដង្ហើមថ្មី ដែលបង្កដោយវីរុសកូរ៉ូណាថ្មីនោះ បានសាងសង់រួចជាស្ថាពរហើយ ដោយចំណាយពេលត្រឹម ៨ ថ្ងៃប៉ុណ្ណោះ។ មន្ទីរពេទ្យនេះយកគំរូតាមមន្ទីរពេទ្យ Xiaotangshan នៅក្រុងប៉េកាំង កាលពីឆ្នាំ ២០០៣ ដែលសង់ដើម្បីប្រឆាំងសនឹងជំងឺ SARS ។ មន្ទីរពេទ្យ Huoshenshan នេះ ចាប់ផ្ដើមបើកការដ្ឋានសាងសង់កាលពីថ្ងៃទី ២៥ មករា សប្ដាហ៍មុន បន្ទាប់ពីតួលេខការឆ្លងរាលដាល និងអ្នកស្លាប់កើនឡើងយ៉ាងគំហុកនៅទីក្រុងវូហាន។
មន្ទីពេទ្យនេះអាចទទួលអ្នកជំងឺពីចន្លោះ ៧០០ ទៅ ១ ០០០ គ្រែ ក្នុងទំហំផ្ទៃដី ២៥ ០០០ ម៉ែត្រក្រឡា ហើយមានបុគ្គលិកពេទ្យជាពេទ្យយោធារបស់ប្រទេសចិនមានចំនួន ១៤០០ នាក់។ ជាមួយគ្នានេះដែរ ក៏មានមន្ទីពេទ្យ Leishenshan ជាមន្ទីពេទ្យទីពីរបន្ទាប់ពីមន្ទីរពេទ្យ Huoshenshan ដែលសាងសង់ឡើងដើម្បីទប់ទល់នឹងជំងឺរាតត្បាតវីរុសកូរ៉ូណាថ្មីនេះ ដែលគ្រោងសាងរួចរាល់នៅថ្ងៃពុធ សប្ដាហ៍នេះដូចគ្នាដែរ។
គិតមកដល់ពេលនេះ នៅប្រទេសចិនមានករណីឆ្លងវីរុសកូរ៉ូណាថ្មីនេះ កើនឡើងច្រើនជាង ១៧ ០០០ ករណី ហើយបណ្ដាលឲ្យមានអ្នកស្លាប់ចំនួន ៣៦១ ករណីនៅប្រទេសចិន និងមាន ១ ករណី ស្លាប់នៅប្រទេសហ្វីលីពីន។
ផ្តល់សិទ្ធិដោយ៖ helloគ្រូពេទ្យ
- Share This Post: