ក្មេងៗពេលផ្ដាសាយ លេបថ្នាំ ១ ប្រភេទនេះ អាចប៉ះពាល់ខួរក្បាល
- February 3, 2020
ភាគច្រើននៅពេលយើង ឬសមាជិកគ្រួសារណាមានជំងឺផ្ដាសាយ តែងតែទៅគ្លីនិក ឬឱសថស្ថានផ្សេងៗ ដើម្បីផ្សំថ្នាំលេបដោយគ្មានការពិនិត្យឲ្យបានត្រឹមត្រូវ។ គ្លីនិក ឬឱសថស្ថានមួយចំនួនបានផ្សំថ្នាំមិនបានត្រឹមត្រូវ ដោយដាក់បញ្ចូលថ្នាំបំបាត់ការឈឺចុកចាប់ ១ ប្រភេទ ដើម្បីឲ្យស្ថានភាពជំងឺឆាប់ជារហ័ស តែលោកវេជ្ជបណ្ឌិតជំងឺទូទៅ លី ឬទ្ធីគុណ បានឲ្យដឹងថា ការប្រើថ្នាំប្រភេទនេះមិនល្អឡើយ ជាពិសេសក្មេងៗ។
វេជ្ជបណ្ឌិត លី ឬទ្ធីគុណ បានបន្តទៀតថា ពេលផ្ដាសាយគេហាមមិនឲ្យប្រើថ្នាំមួយប្រភេទ គឺថ្នាំអាស្ពេរីន។ លោកបានបន្តទៀតថា មិនមែនតែផ្ដាសាយតូច ផ្ដាសាយធំឡើយ ក្ដៅខ្លួន ឬចេញអុតស្វាយឡើយ គឺជំងឺដែលបង្កដោយមេរោគ ក៏ពេទ្យមិនតម្រូវដែរ ព្រោះវានាំឲ្យមានបញ្ហាខួរក្បាល ពោលនាំឲ្យហើមខួរក្បាល និងរីកថ្លើមធ្ងន់ធ្ងរ។ ពេលមានបញ្ហាហើមខួរក្បាល វាភ្ជាប់នឹងជំងឺមួយហៅថា Reye’s syndrome។
អ្នកវិទ្យាសាស្ត្របានបញ្ជាក់ថា Reye’s syndrome នេះវាមិនទាន់មានមូលហេតុអ្វីច្បាស់លាស់នៅឡើយទេ ប៉ុន្តែវាកើតឡើងចំពោះអ្នកប្រើថ្នាំអាស្ពេរីន ចំណែករោគសញ្ញាមានចាប់ពី ៣ ថ្ងៃឡើង នៅពេលខួរក្បាលរីកធ្វើឲ្យមានអាការៈដូចជា ឈឺក្បាល ក្អួតមិនឈប់ ប្រកាច់ ឬសន្លប់ជាដើម។
ប្រសិនបើកូនមានរោគសញ្ញាអស់ទាំងនោះ សូមប្រញាប់នាំកូនទៅមន្ទីរពេទ្យជាប្រញាប់ ដើម្បីទប់ស្កាត់តាមដានស្ថានភាពជំងឺ។ ដូច្នេះហើយមានជំងឺឆ្លងដោយសារមេរោគ សូមប្រើតែ PARACETAMOL និង IBUPROFEN ក្នុងការរក្សាកម្ដៅ និងបំបាត់ការឈឺចាប់។
គួរបញ្ជាក់ផងដែរថា ហើមខួរក្បាលដែលមកពីការប្រើប្រាស់ថ្នាំអាស្ពេរីននោះច្រើន ជាទូទៅវាកើតលើក្មេងក្រោម ១៨ ឆ្នាំ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: