មកដល់ពេលនេះការហាមឃាត់ទៅលើក្រុមហ៊ុន Huawei កំពុងតែនៅបន្តនៅឡើយ ហើយវាបានក្លាយជាល្បែងអុកដ៏ធំមួយ ដែលចាំបាច់ទាំងក្រុមហ៊ុន និងភាគីខាងអាមេរិកត្រូវតែដើរឲ្យមានការប្រុងប្រយ័ត្នបំផុត។ អ្វីដែលយើងឃើញជាក់ស្តែងពេលនេះបញ្ហាធំបំផុតសម្រាប់ក្រុមហ៊ុន Huawei នាពេលបច្ចុប្បន្ននេះគឺកំពុងមានបញ្ហាខ្វះកម្មវិធីសម្រាប់ប្រើនៅក្នុង AppGallery របស់ខ្លួន ក្រោយពេលដែលមិនអាចដំណើរការជាមួយនឹង Google Service បាន។

ទោះបីជាយ៉ាងណាក្តីមកដល់ពេលចុងក្រោយនេះ និងយោងតាមរបាយការណ៍ ដែលត្រូវបានចេញផ្សាយដោយកាសែត រ៉យទ័របានអោយដឹងថា ក្រុមហ៊ុន Huawei បាននឹងកំពុងចាប់ផ្តើមសហការជាមួយក្រុមហ៊ុនស្មាតហ្វូនចិនដទៃទៀតដូចជាក្រុមហ៊ុន Xiaomi, Vivo និង Oppo ដើម្បីជួយដល់ក្រុមអ្នកអភិវឌ្ឍន៍កម្មវិធីនានា (Developers) នៅអន្តរជាតិក្នុងការដាក់បញ្ចូលកម្មវិធីនានាចូលទៅក្នុង Store របស់ពួកគេក្នុងពេលដំណាលគ្នា ដែលមានន័យថា រាល់កម្មវិធីណាមួយ ដែលបញ្ចូលទៅក្នុង AppGallary របស់ Huawei នោះនៅក្នុង Store របស់ក្រុមហ៊ុនដទៃទៀតក៏ទទួលបានកម្មវិធីនោះប្រើប្រាស់ដែរ ដែលមានដូចជាហ្គេម តន្ត្រី ខ្សែភាពយន្ត  សៀវភៅ ទស្សនាវដ្តីជាដើម។

គេជឿជាក់ទៀតថា ប្រព័ន្ធដំណើរការរូបរាងថ្មីនេះត្រូវបានគេដាក់ឈ្មោះថា the Global Developer Service Alliance (GDSA) ហើយនឹងអាចបង្ហាញខ្លួនជាផ្លូវការក្នុងខែមិនាខាងមុខនេះ ដោយចាប់យកតំបន់គោលដៅមួយចំនួនដូចជាប្រទេសឥណ្ឌា ម៉ាឡេស៊ី រុស្សី អេស្បាញ ថៃ ហ្វីលីពីន និងវៀតណាមផងដែរ៕

អត្ថបទ៖ ស៊ុនលី