ថ្នាំសម្រកទម្ងន់ប្រភេទនេះ នៅអាមេរិកហាមប្រើខ្លាចកើតជំងឺមហារីក
- February 22, 2020
នុ៎ះ! ប្រយ័ត្នផងស្រីៗគ្នាយើងដែលចង់បានរាងស្អាត ប្រើថ្នាំសម្រកទម្ងន់ ព្រោះរដ្ឋបាលឱសថ និងចំណីអាហារអាមេរិក បានព្រមានពីប្រភេទថ្នាំសម្រកទម្ងន់ Lorcaserin (Belviq) អាចបង្កហានិភ័យ អត្រាកើតមហារីកកាន់តែខ្ពស់។
យោងតាមការធ្វើតេស្តសុវត្ថិភាពរបស់ រដ្ឋបាលឱសថ និងចំណីអាហារអាមេរិក FDA ថ្នាំបញ្ចុះទម្ងន់ពពួក Lorcaserin (Belviq) ត្រូវបានប្រមាន និងហាមយពលរដ្ឋអាមេរិកប្រើប្រាស់ ដោយសារតែថ្នាំនេះអាចបង្កើនហានិភ័យជំងឺមហារីក។
ជាមួយគ្នានេះ FDA ក៏បានស្នើឲ្យមានការប្រមូលក្រុមថ្នាំ Lorcaserin ដែលមានយីហោ Belviq និង Belviq XR ដែលជាផលិតផលរបស់ក្រុមហ៊ុនផលិតឱសថ Eisai ហើយក្រុមហ៊ុននេះ ក៏សម្រេចប្រមូលម៉ាកថ្នាំទាំងពីររបស់ខ្លួន ចូលក្នុងស្តុកវិញដែរ។
Lorcaserin ជាក្រុមថ្នាំផលិតឡើងក្នុងចេតនាជួយឲ្យអ្នកប្រើប្រាស់សម្រកទម្ងន់ ដោយប្រើជាមួយវិធីព្យាបាលជំងឺធាត់ និងលើសទម្ងន់ សុទ្ធតែជាមូលហេតុនាំឲ្យមានបញ្ហាសុខភាពច្រើន ខណៈប្រសិទ្ធភាពរបស់ថ្នាំ គឺធ្វើឲ្យយើងមិនសូវឃ្លានអាហារ។
ប៉ុន្តែតាមរបាយការណ៍របស់ FDA ថ្នាំនេះ អាចបង្កហានិភ័យកើតមហារីកជាច្រើនប្រភេទ ដូចជា មហារីកលំពែង មហារីកសួត និងមហារីកពោះវៀនធំ ដោយក្នុងសេចក្តីថ្លែងការណ៍ចុងក្រោយ FDA អះអាងថា ថ្នាំនេះក៏អាចបង្កឲ្យមានបញ្ហាសរសៃឈាមបេះដូងទៀតផង។
យោងតាមការធ្វើតេស្តសុវត្ថិភាពខាងលើ FDA សរុបសេចក្តីចុងក្រោយថា ថ្នាំនេះ គឺគ្មានសុវត្ថិភាពនោះឡើយ និងអំពាវនាវឲ្យពលរដ្ឋឈប់ប្រើថ្នាំម៉ាកខាងលើ ហើយដើម្បីសុវត្ថិភាព មិនត្រូវបោះចោលផ្តេសផ្តាសនោះដែរ ត្រូវប្រគល់ទៅឲ្យមន្ត្រីគ្រប់គ្រងថ្នាំសង្កូវ ប្រមូលត្រឡប់ចូលកន្លែងដើមវិញ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: